918. සචෙ බ්රාහ්මණ ගච්ඡසි සාකෙතං අඤ්ජනාවනං,
වජ්ජාසි නන්දියං නාම පුත්තං අස්මාකඔරසං.
මාතා පිතා ච තෙ වුද්ධා තෙ තං ඉච්ඡන්ති පස්සිතුං.

919. භුත්තා මයා නිවාපානි රාජිනො පානභොජනං,
තං රාජපිණ්ඩං අවභොත්තුං නාහං බ්රාහ්මණමුස්සහෙ.

920. ඔදහිස්සාමහං පස්සං ඛුරප්පාණිස්ස රාජිනො,
තදාහං සුඛිතො මුත්තො අපි පස්සෙය්ය මාතරං.

921. මිගරාජා පුරෙ ආසිං කොසලස්ස නිකෙතවෙ,
නන්දියො නාම නාමෙන අභිරූපො චතුප්පදො.

922. තං මං වධිතුමාගඤ්ජි දායස්මිං අඤ්ජනාවනෙ,
ධනුං අදෙජ්ඣං කත්වාන උසුං සන්ධාය කොසලො.

923. තස්සාහං ඔදහිං පස්සං ඛුරප්පාණිස්ස රාජිනො,
තදාහං සුඛිතො මුත්තො මාතරං දට්ඨුමාගතො’ති.

අථ කුජ්ඣරථෙසභකෙතුවරො
දරීමුඛ සනෙරුතා ච පුන,
ආසානන්දසිරී ච සුචිත්තවරො
අථධම්මිකනන්දි මිගෙන දස.

924. සච්චං කිරෙව මාහංසු භස්තං බාලොති පණ්ඩිතා,
පස්ස බාලො රහොකම්මං ආවිකුබ්බං න බුජ්ඣති,

925. ත්වං නුඛො සම්ම බාලොසි ඛරපුත්ත විජානහි,
රජ්ජුයා හි පරික්ඛිත්තො වඞ්කොට්ඨො ඔහිතො මුඛො.

926. අපරම්පි සම්ම තෙ බාල්යං යො මුත්තො න පලායසි,
සො ච බාලතරො සම්ම යං ත්වං වහසි සෙනකං.

927. යන්නු සම්මා අහං බාලො අජරාජ විජානහි,
අථ කෙන සෙනකො බාලො තං මෙ අක්ඛාහි පුච්ඡිතො

928. උත්තමත්ථං ලභිත්වාන භරියාය යො පදස්සති,
තෙන ජහිස්සතත්තානං සා චෙවස්ස න හෙස්සති.

929. න වෙ පියං මෙති ජනින්ද තාදිසො
අත්තං නිරං කත්වා පියානි සෙවති,
අත්තාව සෙය්යො පරමාව සෙය්යා
ලබ්භා පියා ඔචිතත්ථෙන පච්ඡාති.

930. අකක්කසං අඵරුසං ඛරධොතං සුපාසියං,
සුඛුමං තිඛිණග්ගඤ්ච කො සූචිං කෙතුමිච්ඡති.

931. සුමජ්ජඤ්ච සුපාසඤ්ච අනුපුබ්බං සුවත්තිතං,
ඝනඝාතිමං පටිත්ථද්ධං කො සූචිං කෙතුමිච්ඡති.

932. ඉතොදානි පතායන්ති සූචියො ඛළිසානි ච,
කොයං කම්මාරගාමස්මිං සූචිං වික්කෙතුමිච්ඡති.

933. ඉතො සත්ථානි ගච්ඡන්ති කම්මන්තා විවිධා පුථු,
කොයං කම්මාරගාමස්මිං සූචිං වික්කෙතුමරහති.