751. අහමෙව දූසියා භූනහතා රඤ්ඤො මහාපතාපස්ස,
එතං මුඤ්චතු ධම්මපාලං හත්ථෙ මෙ දෙව ඡෙදෙහි.

752. අහමෙව දූසියා භූනහතා රඤ්ඤො මහාපතාපස්ස,
එතං මුඤ්චතු ධම්මපාලං පාදෙ මෙ දෙව ඡෙදෙහි.

753. අහමෙව දූසියා භූනහතා රඤ්ඤො මහාපතාපස්ස,
එතං මුඤ්චතු ධම්මපාලං සීසං මෙ දෙව ඡෙදෙහි.

754. නහනූනිමස්ස රඤ්ඤො මිත්තාමච්චා ච විජ්ජරෙ සුහදා,
යෙ න වදන්ති රාජානං මා ඝාතයි ඔරසං පුත්තං.

755. නහනූනිමස්ස රඤ්ඤො මිත්තා ඤාතී ච විජ්ජරෙ සුහදා,
යෙ න වදන්ති රාජානං මා ඝාතයි අත්රජං පුත්තං.

756. චන්දනරසානුලිත්තා බාහා ඡිජ්ජන්ති ධම්මපාලස්ස,
දායාදස්ස පථව්යා පාණා මෙ දෙව රුජ්ඣන්තීති.

757. වික්කම රෙ මහාමිග වික්කම රෙ හරීපද,
ඡින්ද වාරත්තිකං පාසං නාහං එකා වනෙ රමෙ.

758. වික්කමාමි න පාරෙමි භූමිං සුම්භාමි වෙගසා,
දළ්හො වාරත්තිකො පාසො පාදං මෙ පරිකන්තති.

759. අත්ථරස්සු පලාසානි අසිං නිබ්බාහ ලුද්දක,
පඨමං මං හනිත්වාන හන පච්ඡා මහාමිගං.

760. න මෙ සුතං වා දිට්ඨං වා භාසන්තිං මානුසිං මිගිං,
ත්වඤ්ච භද්දෙ සුඛී හොහි එසො චාපි මහාමිගො.

761. එවං ලුද්දක නන්දස්සු සහ සබ්බෙහි ඤාතිභි,
යථාහමජ්ජ නන්දාමි මුත්තං දිස්වා මහාමිගන්ති.

762. වාති ගන්ධො තිමිරානං කුසමුද්දො ච ඝොසවා,
දූරෙ ඉතො හි සුසන්ධි තම්බකාමා තුදන්ති මං

763. කථං සමුද්දමතරි කථං අද්දක්ඛි සෙරුමං,
කථං තස්සා ච තුය්හඤ්ච අහු සග්ගසමාගමො.

764. භරුකච්ඡා පයාතානං වාණිජාන ධනෙසිනං,
මකරෙහම්භිදා නාවා ඵලකෙනාහමප්ලවිං.

765. සා මං සණ්හෙන මුදුනා නිච්චං චන්දනගන්ධිනී,
අඞ්කෙන උද්ධරී භද්දා මාතා පුත්තංව ඔරසං.

766. සාමං අන්නෙන පාණෙන වත්ථෙන සයනෙන ච,
අත්තනාපි ච මද්දක්ඛි එවං තම්බි විජානහීති.

අථජිනවරොහරිතං තිණකො
අථභින්නපලවො උරගොවඝතො,
දරියා පුන කුඤ්ජර භූනහතා
මිගපුත්තමසග්ගවරෙන දස.