708. ජිනො රථස්සමණිකුණ්ඩලෙ ච
පුත්තෙ ච දාරෙ ච තථෙව ජීනො,
සබ්බෙසු භොගෙසු අසෙසිතෙසු
කස්මා න සන්තප්පසි සොකකාලෙ.

709. පුබ්බෙ ව මච්චං විජහන්ති භොගා
මච්චො වා තෙ පුබ්බතරං ජහාති,
අසස්සතා භොගිනො කාමකාමී
තස්මා න සොචාමහං සොකකාලෙ.

710. උදෙති ආපූරති වෙති චන්දො
අත්ථං තපෙත්වාන පලෙති සූරියො,
විදිතා මයා සත්තුක ලොකධම්මා
තස්මා න සොචාමහං සොකකාලෙ.

711. අලසො ගිහී කාමභොගී න සාධු
අසඤ්ඤතො පබ්බජිතො න සාධු,
රාජා න සාධු අනිසම්මකාරි
යො පණ්ඩිතො කොධනො තං න සාධු.

712. නිසම්ම ඛත්තියො කයිරා නානිසම්ම දිසම්පති,
නිසම්ම කාරිනො රඤ්ඤො යසො කින්ති ච වඩ්ඪතීති.

713. කින්නු සන්තරමානොව ලායිත්වා හරිතං තිණං,
ඛාද ඛාදාති විලපි ගතසත්තං ජරග්ගව.

714. න හි අන්නෙන පානෙන මතො ගොණො සමුට්ඨහෙ,
ත්වඤ්ච තුච්ඡං විලපසි යථා තං දුම්මතී තථා.

715. තථෙව තිට්ඨති සීසං හත්ථපාදා ච වාළධි,
සොතා තථෙව තිට්ඨන්ති මඤ්ඤෙ ගොණො සමුට්ඨහෙ.

716. නෙවය්යකස්ස සීසං වා හත්ථපාදා න දිස්සරෙ,
රුදං මත්තිකථූපස්මිං නනු ත්වඤ්ඤෙව දුම්මති.

717. ආදිත්තං වත මං සන්තං ඝතසිත්තංව පාවකං,
වාරිනා විය ඔසිඤ්චං සබ්බං නිබ්බාපයෙ දරං.

718. අබ්බූළ්හං වත මෙ සල්ලං සොකං හදයනිස්සිතං,
යො මෙ සොකපරෙතස්ස පිතුසොකං අපානුදි.

719. සොහං අබ්බූළ්හසල්ලොස්මි වීතසොකො අනාවිලො,
න සොචාමි න රොදාමි තව සුත්වාන මාණව.

720. එවං කරොන්ති සප්පඤ්ඤා යෙ හොන්ති අනුකම්පකා,
විනිවත්තයන්ති සොකම්හා සුජාතො පිතරං යථාති.

721. නයිදං නිච්චං භවිතබ්බං බ්රහ්මදත්ත
ඛෙමං සුභික්ඛං සුඛතා ච කායෙ,
අත්ථච්චයෙ වා අහු සම්පමූළ්හො
භින්තප්ලවො සාගරස්සෙව මජ්ඣෙ.

722. යානි කරොති පුරිසො තානි අත්තනි පස්සති,
කල්යාණකාරී කල්යාණං පාපකාරී ච පාපකං,
යාදිසං වපතෙ බීජං තාදිසං හරතෙ ඵලං.

723. ඉදං තදාචරියවචො පාරාසරියො යදබ්රවි,
මාස්සු ත්වං අකරා පාපං යංතං පච්ඡා කතං තපෙ.

724. අයමෙව සො පිඞ්ගිය ධොනසාඛො
යම්හි ඝාතයිං ඛත්තියානං සහස්සං,
අලඞ්කතෙ චන්දනසාරලිත්තෙ
තමෙව දුක්ඛං පච්චාගතං මමං.

725. සාමාපි ඛො චන්දන ලිත්තගත්තා
සිඞ්ගුව සොහඤ්ජනකස්ස උග්ගතා,
අදිස්වාව කාලං කරිස්සාමි උබ්බරිං
තං මෙ තතො දුක්ඛතරං භවිස්සතීති.