496. උච්චෙ සකුණ ඩෙමාන පත්තයාන විහඞ්ගම,
වජ්ජාසි ඛො ත්වං වාමූරුං චිරං ඛො සා කරිස්සති.

497. ඉදං ඛො සා න ජානාති අසිං සත්තිඤ්ච ඔඩ්ඩිතං,
සා චණ්ඩී කාහති කොධං තං මෙ තපති නො ඉධ.

498. එස උප්පලසන්නාහො නික්ඛමුස්සිසකෙ කතං,
කාසිකඤ්ච මුදුං වත්ථං තප්පතු ධනකාමිකා’ති.

499. උදුම්බරා චිමෙ පක්කා නිග්රොධා ච කපිත්ථනා,
එහි නික්ඛම භුඤ්ජස්සු කිං ජිඝච්ඡාය මීයසි.

500. එවං සො සුහිතො හොති යො වද්දමපචායති,
යථාහමජ්ජ සුහිතො දූමපක්කානිමාසිතො.

501. යං වනෙජො වනෙජස්ස වඤ්චෙය්ය කපිනො කපි,
දහරොපි තං න සද්ධෙය්ය න හි ජිණ්ණො ජරාකපි’ති.

502. පුරෙ තුවං සීලවතං සකාසෙ
ඔක්කන්දිකං කීළසි අස්සමම්හි,
කරොහරෙ මක්කටියානි මක්කට
න තං මයං සීලවතං රමාම.

503. සුතා හි මය්හං පරමා විසුද්ධි
කොමායපුත්තස්ස බහුස්සුතස්ස,
මාදානි මං මඤ්ඤි තුවං යථා පුරෙ
ඣානානුයුත්තා විහරාම ආවුසො.

504. සචෙපි සෙලස්මිං වපෙය්ය බීජං
දෙවො ච වස්සෙ නෙව හි තං රුහෙය්ය,
සුතා හි තෙ සා පරමා විසුද්ධි
ආරා තුවං මක්කට ඣානභූමියාති.

505. පරපාණරොධා ජීවන්තො මංස ලොහිතභොජනො,
වකො වතං සමාදාය උපපජ්ජි උපොසථං.

506. තස්ස සක්කො වතඤ්ඤාය අජරූපෙනුපාගමි,
වීතතපො අජ්ඣප්පත්තො භඤ්ජි ලොහිතපො තපං.

507. එවමෙවං ඉධෙකච්චෙ සමාදානස්මිං දුබ්බලා,
ලහුං කරොන්ති අත්තානං වකොව අජකාරණා’ති.

වරකුම්භසුපත්තසිරිව්හයනො
සුචිසම්මතබින්දුවරො චූසභො,
සරිතංපතිචණ්ඩිජරාකපිනා
අථ මක්කටියා වකකෙන දසාති.

සඞ්කප්පො පදුමො චෙව උදපානෙන තතියං,
අබ්භන්තරං ඝටභෙදං තිකනිපාතම්බි ලඞ්කතන්ති.