358. සඞ්කප්පරාගධොතෙන විතක්කනිසිතෙන ච,
නාලඞ්කතෙන භද්දෙන න උසුකාරකතෙන ච.

359. න කණ්ණායතමුත්තෙන නපි මොරූපසෙවිනා,
තෙනම්හි හදයෙ විද්ධො සබ්බඞ්ගපරිදාහිනා.

360. ආවෙධඤ්ච න පස්සාමි යතො රුහිරමස්සවෙ,
යාව අයොනිසො චිත්තං සයං දුක්ඛමාභත’න්ති.

361. අජ්ජාපි මෙ තං මනසි යං මං ත්වං තිලමුට්ඨියා,
බාහාය මං ගහෙත්වාන ලට්ඨියා අනුතාළයි.

362. නනු ජීවිතෙ න රමසි යෙනාසි බ්රාහ්මණාගතො.
යං මං බාහං ගහෙත්වාන තික්ඛත්තුං අනුතාළයී.

363. අරියො අනරියං කුබ්බානං යො දණ්ඩෙන නිසෙධති,
සාසනත්ථං න තං වෙරං ඉති නං පණ්ඩිතා විදූති.

364. මමන්නපානං විපුලං උළාරං
උප්පජ්ජතීමස්ස මණිස්ස හෙතු,
තං තෙ න දස්සං අතියාචකොසි
න චාපි තෙ අස්සමං ආගමිස්සං.

365. සුසූ යථා සක්ඛරධොතපාණී
තාසෙසි මං සෙලං යාචමානො,
තං තෙ න දස්සං අතියාචකොසි
න චාපි තෙ අස්සමං ආගමිස්සං.

366. න තං යාචෙ යස්ස පියං ජිගිංසෙ
දෙස්සො හොති අතියාචනාය,
නාගො මණිං යාචිතො බ්රාහ්මණෙන
අදස්සනංයෙව තදජ්ඣගමා’ති.

367. භුත්වා තිණපරිඝාසං භුත්වා ආවාමකුණ්ඩකං,
එතං තෙ භොජනං ආසි කස්මාදානි න භුඤ්ජසී.

368. යත්ථ පොසං න ජානන්ති ජාතියා විනයෙන වා,
පහූ තත්ථ මහාබ්රහ්මෙ අපි ආචාමකුණ්ඩකං.

369. ත්වඤ්ච ඛො මං පජානාසි යාදිසායං හයුත්තමො,
ජානන්තො ජානමාගම්ම න තෙ භක්ඛාමි කුණ්ඩකන්තී.

370. යාව සො මත්තමඤ්ඤාසි භොජනස්මිං විහඞ්ගමො,
තාව අද්ධානමාපාදි මාතරඤ්ච අපොසයි.

371. යතො ච ඛො බහුතරං භොජනං අජ්ඣුපාහරි
තතො තත්ථෙව සංසීදි අමත්තඤ්ඤූ හි සො අහූ.

372. තස්මා මත්තඤ්ඤුතා සාධු භොජනස්මිං අගිද්ධතා.
අමත්තඤ්ඤූ හි සීදන්ති මත්තඤ්ඤූ ව න සීදරෙති.

373. ජරූදපානං ඛණමානා වාණිජා උදකත්ථිකා,
අජ්ඣගංසු අයො ලොහං තිපුසීසඤ්ච වාණිජා:
රජතං ජාතරූපඤ්ච මුත්තා වෙළුරියා බහු.

374. තෙ ච තෙන අසන්තුට්ඨා භිය්යො භිය්යො අඛාණිසුං,
තෙ තත්ථාසිවිසො ඝොරො තෙජස්සී තෙජසා හනි.