478. සබ්බකාමද්දං කුම්භං කුටං ලද්ධාන ධුත්තකො,
යාව සො අනුපාලෙති තාව සො සුඛමෙධති.

479. යදා මත්තො ච දිත්තො ච පමාදා කුම්භමබ්භිදා,
තතො නග්ගො ච පොත්ථො ච පච්ඡා බාලො විහඤ්ඤති

480. එවමෙව යො ධනං ලද්ධා අමත්තා පරිභුඤ්ජති,
පච්ඡා තපති දුම්මෙධො කූටං භින්නොව ධුත්තකො’ති.

481. බාරාණස්සං මහාරාජ කාකරාජා නිවාසිකො,
අසීතියා සහස්සෙහි සුපත්තො පරිවාරිතො.

482. තස්ස දොහළිනී භරියා සුඵස්සා මච්ඡමිච්ඡති,
රඤ්ඤො මහානසෙ පක්කං පච්චගඝං රාජභොජනං.

483. තෙසාහං පහිතො දූතො රඤ්ඤො චම්හි ඉධාගතො,
භත්තු අපචිතිං කුම්මි නාසායමකරං වණන්ති.

484. ඵුට්ඨස්ස මෙ අඤ්ඤතරෙන ව්යාධිනා
රොගෙන බාළ්හං දුඛිතස්ස රුප්පතො,
පරිසුස්සති ඛිප්පමිදං කළෙබරං
පුප්ඵං යථා සංසුනි ආතපෙ කතං.

485. අජඤ්ඤං ජඤ්ඤසඞ්ඛාතං අසුචිං සුචිසම්මතං,
නානාකුණපපරිපූරං ජඤ්ඤරූපං අපස්සතො

486. ධිරත්ථු තං ආතුරං පූතිකායං
ජෙගුච්ඡියං අසුචිං බ්යාධිධම්මං,
යත්ථප්පමන්තා අධිමුච්ඡිතා පජා
හාපෙන්ති මග්ගං සුගතූපපත්තියා’ති

487. කොයං බින්දුස්සරො වග්ගු පවදන්තානමුත්තමො,
අච්චුතො ජම්බුසාඛාය මොජච්ඡාපොව කූජති.

488. කුලපුත්තොව ජානාති කුලපුත්තෙ පසංසිතුං,
ව්යග්ඝච්ඡාපසරීවණ්ණො භුඤ්ජ සම්ම දදාමි තෙ.

489. චිරස්සං වත පස්සාමි මුසාවාදී සමාගතෙ,
වන්තාදං කුණපාදඤ්ච අඤ්ඤමඤ්ඤං පසංසකෙ’ති.

490. උසභස්සෙව තෙ ඛන්ධො සීහස්සෙව විජම්හිතං,
මිගරාජ නමොත්යුත්ථු අපි කිඤ්චි ලභාමසෙ.

491. කුලපුත්තොව ජානාති කුලපුත්තෙ පසංසිතුං,
මයූරගීවසඞ්කාස ඉතො පරියාහි වායස.

492. මිගානං කොත්ථුකො අන්තො පක්ඛීනං පන වායසො,
එරණ්ඩො අන්තො රුක්ඛානං තයො අන්තා සමාගතා’ති.

493. කොනායං ලොණතොයස්මිං සමන්තා පරිධාවති,
මච්ඡෙ මකරෙ ච වාරෙති ඌමීසු ච විහඤ්ඤති.

494. අනන්තපායී සකුණො අතිත්තොති දිසාසුතො,
සමුද්දං පාතුමිච්ඡාමි සාගරං සරිතං පතිං.

495. ස්වායං හායති චෙව පුරතෙ ච මහොදධි,
නාස්ස නායති පීතන්තො අපෙය්යො කිර සාගරො’ති.