436. වස්සානි පඤ්ඤාස සමාධිකානි
වසිම්හ සෙලස්ස ගුහාය රොමක,
අසඞ්කමානා අභිනිබ්බුතත්තා
හත්ථත්තමායන්ති මමණ්ඩජා පුරෙ

437. තෙදානි වක්කඞ්ග කිමත්ථමුසසුකා
භජන්ති අඤ්ඤං ගිරිකන්දරං දිජා,
න නූන මඤ්ඤන්ති මමං යථා පුරෙ
චිරප්පවුත්ථා අථවා න තෙ ඉමෙ.

438. ජානාම තං න මයමස්ම මූළ්හා
සොයෙව ත්වන්තෙ මයමස්ම නාඤ්ඤො,
චිත්තඤ්ච තෙ අස්මිං ජනෙ පදුට්ඨං
ආජිවක තෙන තං උත්තසාමාති.

439. කමත්ථමභිසන්ධාය ලහුචිත්තස්ස දූභිනො,
සබ්බකාමදුභස්සෙව ඉදං දුක්ඛං තිතික්ඛසි.

440. සිඞ්ගෙන නිහනාහෙතං පදසා ච අධිට්ඨහ,
භීයො බාලා පකුජ්ඣෙය්යුං නො චස්ස පටිසෙධකො.

441. මමෙවායං මඤ්ඤමානො අඤ්ඤම්පෙවං කරිස්සති,
තෙ තං තත්ථ වධිස්සන්ති සා මෙ මුත්ති භවිස්සතී’ති.

442. යථා මාණවකො පන්ථෙ සිගාලිං වනගොචරිං,
අත්ථකාමං පවෙදෙන්තිං අනත්ථකාමාති මඤ්ඤති
අනත්ථකාමං සතපත්තං අත්ථකාමොති මඤ්ඤති.

443. එවමෙව ඉධෙකච්චො පුග්ගලො හොති තාදිසො,
හිතෙහි වචනං වුත්තො පතිගණ්හාති වාමතො.

444. යෙ ච ඛො නං පසංසන්ති භයා උක්කංසයන්ති ච
තඤ්හි සො මඤ්ඤතෙ මිත්තං සතපත්තංව මාණවො’ති

445. අද්ධා හි නූන මිගරාජා පුටකම්මස්ස කොවිදො,
තථාහි පුටං දූසෙති අඤ්ඤං නූන කරිස්සති.

446. න මෙ පිතා වා මාතා වා පුටකම්මස්ස කොවිදො,
කතං කතං ඛො දූසෙම එවං ධම්මමිදං කුලං.

447. යෙසං වො එදිසො ධම්මො අධම්මො පන කීදිසො,
මා වො ධම්මං අධම්මං වා අද්දසාම කුදාචන’න්ති.

උදපානවරං වනබ්යග්ඝකපි
සිඛිනී ච බලාකරුචිරවරො,
සුජනාධිපරොමකදූස පුන
සතපත්තවරො පුටකම්ම දසා’ති.