409. යො චෙ සබ්බසමෙතානං අහුවා සෙට්ඨසම්මතො
තස්සායං එදිසී පඤ්ඤා කිමෙව ඉතරා පජා.

410. එවමෙව තුවං බ්රහ්මෙ අනඤ්ඤාය විනින්දසි
කථං මූලං අදිස්වාන රුක්ඛං ජඤ්ඤා පතිට්ඨිතං.

411. නාහං තුම්හෙ විනින්දාමි යෙ චඤ්ඤෙ වානරා වනෙ,
විස්සසෙනොව ගාරය්හො යස්සත්ථා රුක්ඛරොපකා’ති

412. න හි වණ්ණෙන සම්පන්නා මඤ්ජුකා පියදසස්නා
ඛරවාචා පියා හොන්ති අස්මිං ලොකෙ පරම්හි ච.

413. නනු පස්සසිමං කාළිං දුබ්බණ්ණං තිලකාහතං,
කොකිලං සණ්හභාණෙන බහුන්නං පාණිනං පියං.

414. තස්මා සඛිලවාචස්ස මත්තභාණි අනුද්ධතො,
අත්ථං ධම්මඤ්ච දීපෙති මධුරං තස්ස භාසිතන්ති.

415. සබ්බෙහි කිර ඤාතීහි කොසියො ඉස්සරො කතො,
සචෙ ඤාතීහනුඤ්ඤාතො භණෙය්යාහං එකවාචියං.

416. භණ සම්ම අනුඤ්ඤාතො අත්ථං ධම්මඤ්ච කෙවලං,
සන්ති හි දහරා පක්ඛී පඤ්ඤාවන්තො ජුතින්ධරා.

417. න මෙ රුච්චති භද්දං වො උලූකස්සාභිසෙචනං,
අකුද්ධස්ස මුඛං පස්ස කථං කුද්ධො කරිස්සතීති.

පදුමුත්තමනාගසිරිව්හයනො
සමහණ්ණවයූපඛුරප්පවරො,
අථ කුන්දලිකුඤ්ජරරුක්ඛ පුන
ඛරවාචඋලූකවරෙන දසා’ති.

418. ආරඤ්ඤකස්ස ඉසිනො චිරරත්තතපස්සිනො,
කිච්ඡා කතං උදපානං කථං සම්ම අවාහසි.

419. එසධම්මො සිගාලානං යම්පීත්වා ඔභදාමසෙ,
පිතුපිතාමහං ධම්මො න නං උජ්ඣාතුමරහසි.

420. යෙසං වො එදිසො ධම්මො අධම්මො පන කීදිසො,
මා වො ධම්මං අධම්මං වා අද්දසාම කුදාචනන්ති.

421. යෙන මිත්තෙන සංසග්ගා යොයගක්ඛෙමො විහිංසති,
පුබ්බෙවජ්ඣාහවන්තස්ස රක්ඛෙ අක්ඛීව පණ්ඩිතො,

422. යෙන මිත්තෙන සංසග්ගා යොගක්ඛෙමො පවඩ්ඪති,
කරෙය්යත්තසමං වුත්තිං සබ්බකිච්චෙසු පණ්ඩිතො.

423. එථ ව්යග්ඝා නිවත්තව්හො පච්චමෙථ මහාවනං,
මා වනං ඡින්දි නිව්යග්ඝං ව්යග්ඝා මාහෙසු නිබ්බනා’ති.

424. කො නු උද්දීතභත්තොව පූරහත්ථොව බ්රාහ්මණො,
කහන්නු භික්ඛං අචරි කං සද්ධං උපසඞ්කමි.

425. අහං කපිස්මි දුම්මෙධො අනාමාසානි ආමසිං,
ත්වං මං මොවය භද්දන්තෙ මුත්තො ගච්ඡෙය්ය පබ්බතං

426. කච්ඡපා කස්සපා හොන්ති කොණ්ඩඤ්ඤා හොන්ති මක්කටා,
මුඤ්ච කස්සප කොණ්ඩඤ්ඤං කතං මෙථුනකං තයා’ති.