373. ජරූදපානං ඛණමානා වාණිජා උදකත්ථිකා,
අජ්ඣගංසු අයො ලොහං තිපුසීසඤ්ච වාණිජා:
රජතං ජාතරූපඤ්ච මුත්තා වෙළුරියා බහු.

374. තෙ ච තෙන අසන්තුට්ඨා භිය්යො භිය්යො අඛාණිසුං,
තෙ තත්ථාසිවිසො ඝොරො තෙජස්සී තෙජසා හනි.

375. තස්මා ඛණෙ නාතිඛණෙ අතිඛාතං හි පාපකං,
ඛාතෙන ව ධනං ලද්ධං අතිඛාතෙන නාසිතන්ති.

376. නායං ඝරානං කුසලො ලොලො අයං වලීමුඛො,
කතං කතං ඛො දූසෙය්ය එවං ධම්මමිදං කුලං.

377. නයිදං චිත්තවතො ලොමං නායං අස්සාසිකො මිගො,
සත්ථං මෙ ජනසන්ධෙන නායං කිඤ්චි විජානාති.

378. න මාතරං වා පිතරං භාතරං භගිණං සඛං,
භරෙය්ය තාදිසො පොසො සිට්ඨං දසරථෙන මෙති.

379. යාවතා චන්දිමසූරියා පරිහරන්ති දිසාභන්ති විරොචනා,
සබ්බෙව දාසා මන්ධාතු යෙ පාණා පඨවිනිස්සිතා.

380. න කහාපණවස්සෙන තිත්ති කාමෙසු විජ්ජති,
අප්පස්සාදා දුඛා කාමා ඉති විඤ්ඤාය පණ්ඩිතො.

381. අපි දිබ්බෙසු කාමෙසු රතිං සො නාධිගච්ඡති,
තණ්හක්ඛයරතො හොති සම්මාසම්බුද්ධසාවකො’ති.

382. නයිමස්ස විජ්ජාමයමත්ථි කිඤ්චි
න බන්ධවො නො පන තෙ සහායො,
අථ කෙන වණ්ණෙන තිරීටවච්ඡො
තෙදණ්ඩිකො භුඤ්ජති අග්ගපිණ්ඩං.