5662. එවං සමනුසාසිත්වා ඤාතිසඞ්ඝං විචක්ඛණො,
පරිකිණ්ණො සුහදෙහි රාජානමුපසඞ්කමී.

5663. වන්දිත්වා සිරසා පාදෙ කත්වා ච නං පදක්ඛිණං,
විධුරො අවච රාජානං පග්ගහෙත්වාන අඤ්ජලිං.

5664. අයං මං මාණවො නෙති කත්තුකාමො යථාමතිං,
ඤාතීනත්ථං පවක්ඛාමි තං සුණොහි අරින්දම.

5665. පුත්තෙ ච මෙ උදික්ඛෙසි යඤ්ච මඤ්ඤං ඝරෙ ධනං,
යථා පෙච්ච න හායෙථ ඤාතිසඞ්ඝො මයි ගතෙ.

5666. යථෙව ඛලති භුම්යා භූමියාව පතිට්ඨති,
එවෙතං ඛලිතං මය්හං එතං පස්සාමි අච්චයං.

5667. සක්කා න ගන්තුං ඉති මය්හ හොතී
ඣත්වා වධිත්වා ඉධ කාතියානං,
ඉධෙව හොහි ඉති මය්හං රුච්චති
මා ත්වං අගා උත්තමභූරිපඤ්ඤ.

5668. මාහෙව ධම්මෙසු මනං පණීදහි
අත්ථෙ ච ධම්මෙ ච යුත්තො භවස්සු,
ධිරත්ථු කම්මං අකුසලං අනරියං
යං කත්වා පච්ඡා නිරයං වජෙය්ය.

5669. නෙවෙස ධම්මො න පුනෙතං කිච්චං
අයිරො හි දාසස්ස ජනින්ද ඉස්සරො,
ඝාතෙතුං ඣාපෙතුං අථොපි භත්තුං
න ච මය්හං කොධත්ථි වජාමි චාහං.

5670. ජෙට්ඨපුත්තං උපගුය්හ විනෙය්ය හදයෙ දරං,
අස්සුපුණ්ණෙහි නෙත්තෙහි පාවිසි සො මහාඝරං.

5671. සාලාව සම්පමථිතා මාළුතෙන පමද්දිතා,
සෙන්ති පුත්තා ච දාරා ච විධුරස්ස නිවෙසනෙ.

5672. ඉත්ථිසහස්සං භරියානං දාසිසත්තසතානි ච,
බාහා පග්ගය්හ පක්කන්දුං විධුරස්ස නිවෙසනෙ.

5673. ඔරොධා ච කුමාරා ච වෙසියානා ච බ්රාහ්මණා,
බාහා පග්ගය්හ පක්කන්දුං විධුරස්ස නිවෙසනෙ.

5674. හත්ථාරූහා අනීකට්ඨා රථිකා පත්තිකාරකා,
බාහා පග්ගය්හ පක්කන්දුං විධුරස්ස නිවෙසනෙ.

5675. සමාගතා ජානපදා නෙගමා ච සමාගතා,
බාහා පග්ගය්හ පක්කන්දුං විධුරස්ස නිවෙසනෙ.