5602. එහි දානි ගමිස්සාම දින්නො නො ඉස්සරෙන මෙ,
මමෙවත්ථං පටිපජ්ජ එස ධම්මො සනන්තනො.

5603. ජානාමි මාණව තයාහමස්මි
දින්නොහමස්මි තව ඉස්සරෙන,
තීහඤ්ච තං වාසයෙමු අගාරෙ
යෙනද්ධුනා අනුසාසෙමු පුත්තෙ.

5604. තං මෙ තථා හොතු වසෙමු තීහං
කුරුතං භවං අජ්ජ ඝරෙසු කිච්චං,
අනුසාසතං පපුත්තදාරෙ භවජ්ජ
යථා තයි පච්ඡා සුඛී භවෙය්ය.

5605. සාධූති වත්වාන පහූතකාමො
පක්කාමි යක්ඛො විධුරෙන සද්ධිං,
තං කුඤ්ජරාජඤ්ඤහයානුචිණ්ණං
පාවෙක්ඛි අන්තොපුරමරියසෙට්ඨො.

5606. කොඤ්චං මයූරඤ්ච පියඤ්ච කෙතං
උපාගමී තත්ථ සුරම්ම රූපං,
පහූතභක්ඛං බහු අන්නපානං
මසක්කසාරං විය වාසවස්ස.

5607. තත්ථ නච්චන්ති ගායන්ති අව්හයන්ති වරා වරං,
අච්ඡරා විය දෙවෙසු නාරියො සමලඞ්කතා.

5608. සමඞ්ගි කත්වා පමදාහි යක්ඛං
අන්නෙන පානෙන ච ධම්මපාලො,
අත්තත්ථමෙවානුවිචින්තයන්තො
පාවෙක්ඛි භරියාය තදා සකාසෙ.

5609. තං චන්දනගන්ධරසානුලිත්තං
සුවණ්ණජම්බොනදනික්ඛසාදිසං,
භරියංවචා එහි සුණොහි භොති
පුත්තානි ආමන්තය තම්බනෙත්තෙ.

5610. සුත්වාන වාක්යං පතිනො අනුජ්ජා
සුනිසං වච තම්බනඛී සුනෙත්තං,
ආමන්තය වම්මධරානි චෙතෙ
පුත්තානි ඉන්දීවරපුප්ඵසාමෙ.

5611. තෙ ආගතෙ මුද්ධනි ධම්මපාලො
චුම්බිත්වා පුත්තෙ අවිකම්පමානො,
ආමන්තයිත්වාන අවොච වාක්යං
දින්නාහං රඤ්ඤා ඉධ මාණවස්ස.

5612. තස්සජ්ජහං අත්තසුඛී විධෙය්යො
ආදාය යෙනිච්ඡති තෙන ගච්ඡති,
අහං ච වො සාසිතුං ආගතොස්මි
කථං අහං අපරිත්තාය ගච්ඡෙ.

5613. සචෙ වො රාජා කුරුඛෙත්තවාසී
ජනසන්ධො පුච්ඡෙය්ය පහූතකාමො,
කිමාභිජානාථ පුරෙ පුරාණං
කිං වො පිතා අනුසාසෙ පුරත්ථා.

5614. සමාසනා හොථ මයාව සබ්බෙ
කොනීධ රඤ්ඤො අබ්භතිකො මනුස්සො
තමඤ්ජලිං කරිය වදෙථ එවං
මාහෙව දෙව නහි එස ධම්මො,
වියග්ඝරාජස්ස නිභීනජච්චො
සමාසනො දෙව කථං භවෙය්ය.

5615. සො ච මිත්තෙ අමච්චෙ ච ඤාතයො සුහදං ජනෙ,
අලීනමනසඞ්කප්පො විධුරො එතදබ්රවි.

5616. එථය්යො රාජවසතිං නිසීදිත්වා සුණොථ මෙ,
යථා රාජකුලං පත්තො යසං පොසො නිගච්ඡති.

5617. නහි රාජකුලං පත්තො අඤ්ඤාතො ලභත්ත යසං,
නාසූරො නපි දුම්මෙධො නප්පමත්තො කුදාචනං.

5618. යදාස්ස සීලං පඤ්ඤඤ්ච සොචෙය්යඤ්චාධිගච්ඡති,
අථ විස්සසතෙ ත්යම්හි ගුය්හඤ්චස්ස න රක්ඛති.

5619. තුලා යථා පග්ගහිතා සමදණ්ඩා සුධාරිතා,
අජ්ඣිට්ඨො න විකම්පෙය්ය ස රාජවසතිං වසෙ.