5716. අවසිං අහං තුය්හ තීහං අගාරෙ
අන්නෙන පානෙන උපට්ඨිතොස්මි,
මිත්තො මමාසි විසජාමහං තං
කාමං ඝරං උත්තමපඤ්ඤ ගච්ඡ.

5717. අපි හායතු නාගකුලස්ස අත්ථො
අලම්පි මෙ නාගකඤ්ඤාය හොතු,
සො ත්වං සකෙනෙව සුභාසිතෙන
මුත්තොසි මෙ අජ්ජ වධාය පඤ්ඤ.

5718. හන්ද තුවං යක්ඛ මමම්පි නෙහි
සසුරං නු තෙ අත්ථං මයී චරස්සු,
මයම්පි නාගාධිපතිං විමානං
දක්ඛෙමු නාගස්ස අදිට්ඨපුබ්බං.

5719. යං වෙ නරස්ස අහිතාය අස්ස
න තං පඤ්ඤො අරහති දස්සනාය
අථ කෙන වණ්ණෙන අමිත්තගාමං
තුවම්පිච්ඡසි උත්තමපඤ්ඤ ගන්තුං.

5720. අද්ධා පජානාමි අහම්පි එතං
න තං පඤ්ඤො අරහති දස්සනාය,
පාපඤ්ච මෙ නත්ථි කතං කුහිඤ්චි
තස්මා න සඞ්කෙ මරණාගමාය.

5721. හන්ද ච ඨානං අතුලානුභාවං.
මයා සහා දක්ඛිසි එහි කත්තෙ,
යත්ථච්ඡති නච්චගීතෙහි නාගො
රාජා යථා වෙස්සවණො නලිඤ්ඤං.

5722. තං නාගකඤ්ඤාචරිතං ගණෙන
නිකීළිතං නිච්චමහො ච රත්තිං,
පහූතමාල්යං බහුපුප්ඵඡන්නං
ඔභාසතී විජ්ජුරිවන්තලික්ඛෙ.

5723. අන්නෙන පානෙන උපෙතරූපං
නච්චෙති ගීතෙහි ච වාදිතෙහි,
පරිපූරං කඤ්ඤාහි අලඞ්කතාහි
උපසොභති වත්ථපිළන්ධනෙන.

5724. සො පුණ්ණකො කුරූනං කත්තසෙට්ඨං.
නිසීදයි පච්ඡතො ආසනස්මිං,
ආදාය කත්තාරං අනොමපඤ්ඤං
උපානයී භවනං නාගරඤ්ඤො.

5725. පත්වාන ඨානං අතුලානුභාවං
අට්ඨාසි කත්තා පච්ඡතො පුණ්ණකස්ස
සාමග්ගිපෙක්ඛී පන නාගරාජා
පුබ්බෙව ජාමාතරමජ්ඣභාසථ.

5726. යන්නු තුවං අගමා මච්චලොකං
අන්වෙසමානො හදයං පණ්ඩිතස්ස,
කච්චි සමිද්ධෙන ඉධානුපත්තො
ආදාය කත්තාරං අනොමපඤ්ඤං.

5727. අයං හි සො ආගතො යං ත්වමිච්ඡසි
ධම්මෙන ලද්ධො මම ධම්මපාලො,
තං පස්සථ සම්මුඛා භාසමානං
සුඛො භවෙ සප්පුරිසෙහි සඞ්ගමො.