5283. අහු රාජා විදෙහානං අඞ්ගාති නාම ඛත්තියො,
පහූතයොග්ගො ධනිමා අනන්තබලපොරිසො.

5284. සො ච පණ්ණරසිං රත්තිං පුරිමෙ යාමෙ අනාගතෙ,
චාතුමස්ස කොමුදියා අමච්චෙ සන්නිපාතයි.

5285. පණ්ඩිතෙ සුතසම්පන්නෙ මිහිතපුබ්බෙ විවක්ඛණෙ,
විජයඤ්ච සුනාමඤ්ච සෙනාපතිමලාතකං.

5286. තමනුපුච්ඡි වෙදෙහො පච්චෙකං බ්රූථ සංරුචිං,
චාතුමස්ස කොමුදජ්ජ ජුණ්හං ව්යපගතං තමං
කායජ්ජ රතියා රත්තිං විහරෙමු ඉමං උතුං.

5287. තතො සෙනාපතී රඤ්ඤො අලාතො එතදබ්රවි,
හට්ඨං යොග්ගං බලං සබ්බං සෙනං සන්තාහයාමසෙ.

5288. නිය්යාම දෙව යුද්ධාය අනන්තබලපොරිසා,
යෙ තෙ වසං න ආයන්ති වසං උපනයාමසෙ,
එසා මය්හං සකාදිට්ඨි අජිතං ඔජිනාමසෙ.

5289. අලාතස්ස වචො සුත්වා සුනාමො එතදබ්රවි,
සබ්බෙ තුය්හං මහාරාජ අමිත්තා වසමාගතා.

5290. නික්ඛිත්තසත්ථා පච්චත්ථා නිවාතමනුවතතරෙ,
උත්තමො උස්සවො අජ්ජ න යුද්ධං මම රුච්චති.

5291. අන්නං පානඤ්ච ඛජ්ජඤ්ච ඛිප්පං අභිහරන්තු තෙ,
රමස්සු දෙව කාමෙහි නච්චගීතෙ සුවාදිතෙ.

5292. සුනාමස්ස වචො සුත්වා විජයො එතදබ්රවි,
සබ්බෙ කාමා මහාරාජ නිච්චං තව අපට්ඨිතා.

5293. න හෙතෙ දුල්ලභා දෙව තව කාමෙහි මොදිතුං,
සදාපි කාමා ලබ්භන්ති නෙතං චිත්තමතං මම,

5294. සමණං බ්රාහ්මණං වාපි උපාසෙමු බහුස්සුතං,
යො නජ්ජ විනයෙ කඞ්ඛං අත්ථධම්මවිදූ ඉසෙ.

5295. විජයස්ස වචො සුත්වා රාජා අඞ්ගාතිමබ්රවි,
යථා විජයො භණති මය්හම්පෙතෙව රුච්චති.

5296. සමණං බ්රාහ්මණං වාපි උපාසෙමු බහුස්සුතං,
යො නජ්ජ විනයෙ කඞ්ඛං අත්ථධම්මවිදූ ඉසෙ.

5297. සබ්බෙව සන්තා කරොථ මතිං කං උපාසෙමු පණ්ඩිතං,
කො නජ්ජ විනයෙ කඞ්ඛං අත්ථධම්මවිදූ ඉසෙ.

5298. වෙදෙහස්ස වචො සුත්වා අලාතො එතදබ්රවි,
අත්ථාය මිගදායස්මිං අචෙලො ධීරසම්මතො.