4743. අච්ඡෙරං වත ලොකස්මිං උප්පජ්ජන්ති විචක්ඛණා,
යදා අහූ නිමිරාජා පණ්ඩිතො කුසලත්ථිකො.

4744. රාජා සබ්බවිදෙහානං අදා දානං අරින්දමො,
තස්ස තං දදතො දානං සඞ්කෙප්පා උදපජ්ජථ.
දානං වා බ්රහ්මචරියං වා කතමංසු මහප්ඵලං.

4745. තස්ස සඞ්කප්පමඤ්ඤාය මඝවා දෙවකුඤ්ජරො,
සහස්සනෙත්තො පාතුරහූ වණ්ණෙන නිහතං තමං.

4746. ස ලොමහට්ඨො මනුජින්දො වාසවං අවචා නිමි,
දෙවතානුසි ගන්ධබ්බො ආදු සක්කො පුරින්දදො.

4747. න ච මෙ තාදිසො වණ්ණො දිට්ඨො වා යදි වා සුතො,
ආචික්ඛ මෙ ත්වං භද්දන්තෙ කථං ජානෙමු තං මයං.

4748. ස ලොමහට්ඨං ඤත්වාන වාසවො අවචා නිමිං,
සක්කොහමස්මි දෙවින්දො ආගතොස්මි තවන්තිකො.

4749. අලොමහට්ඨො මනුජින්ද පුච්ඡ පඤ්හං යදිච්ඡසි.
සො ච තෙන කතොකාසො වාසවං අවචා නිමි.

4750. පුච්ඡාමි තං මහාබාහු සබ්බභූතානමිස්සර,
දානං වා බ්රහ්මචරියං වා කතමංසු මහප්ඵලං.

4751. සො පුට්ඨො නරදෙවෙන වාසවො අවචා නිමිං,
විපාකං බ්රහ්මචරියස්ස ජානං අක්ඛාසජානතො.

4752. හීනෙන බ්රහ්මචරියෙන ඛත්තියෙ උපපජ්ජති,
මජ්ඣිමෙන ච දෙවත්තං උත්තමෙන විසුජ්ඣති.

4753. නහෙතෙ සුලභා කායා යාවයොගෙන කෙනචි,
යො කායෙ උපපජ්ජන්ති අනාගාරා තපස්සිනො.

4754. දුදීපො සාගරො සෙලො මුචලින්දො භගීරසො,
උසීනරො අට්ඨකො ච අස්සකො ච පුථුජ්ජනො,

4755. එතෙ චඤ්ඤෙ ච රාජානො ඛත්තියා බ්රාහ්මණා බහු,
පුථු යඤ්ඤං යජිත්වාන පෙතං තෙ නාතිවත්තිසුං.

4756. යෙ වෙ අදුතියා න රමන්ති එකිකා
විවෙකජං යෙ න ලභන්ති පීතිං,
කිඤ්චාපි තෙ ඉන්දසමානභොගා
තෙ වෙ පරාධීනසුඛා වරාකා.