6644. තෙසං ලාලප්පිතං සුත්වා තයො වාලා වනෙ මිගා,
සීහො ව්යග්ඝො ච දීපි ච ඉදං වචනමබ්රවුං.

6645. මාහෙව නො රාජපුත්තී සායං උඤ්ඡාතො ආගමා,
මාහෙවම්භාකං නිබ්භොගෙ හෙඨයිත්ථ වනෙ මිගා.

6646. සීහො චෙනං විහෙඨෙය්ය ව්යග්ඝො දීපි ච ලක්ඛණං,
නෙව ජාලීකුමාරස්ස කුතො කණ්හාජිනා සියා;
උභයෙනෙව ජීයෙථ පතිං පුත්තෙ ච ලක්ඛණාති.

6647. ඛණිත්තිකං මෙ පතති දක්ඛිණක්ඛී ච ඵන්දති,
අඵලා ඵලිනො රුක්ඛා සබ්බා මුය්හන්ති මෙ දිසා.

6648. තස්සා සායන්හකාලම්හි අස්සමාගමනං පති,
අත්ථඞ්ගතම්භි සුරියම්හි වාලා පන්ථෙ උපට්ඨහුං.

6649. නීචෙ වොලම්බතෙ සුරියො දූරෙ ච වත අස්සමො,
යඤ්ච නෙසං ඉතො භස්සං තං තෙ භුඤ්ජෙය්යුං භොජනං.

6650. සො නූන ඛත්තියො එකො පණ්ණසාලාය අච්ඡති,
තොසෙන්තො දාරකෙ ඡාතෙ මමං දිස්වා අනායතිං.

6651. තෙ නූන පුත්තකා මය්හං කපණාය වරාකියා,
සායං සංවෙසනාකාලෙ ඛිරපීතාව අච්ඡරෙ.

6652. තෙ නූන පුත්තකා මය්හං කපණාය වරාකියා,
සායං සංවෙසනාකාලෙ වාරිපීතාව අච්ඡරෙ.

6653. තෙ නූන පුත්තකා මය්හං කපණාය වරාකියා,
පච්චුග්ගතා මං තිට්ඨන්ති වච්ඡා බාලාව මාතරං.

6654. තෙ නූන පුත්තකා මය්හං කපණාය වරාකියා,
පච්චුග්ගතා මං තිට්ඨන්ති හංසාව උපරි පල්ලලෙ.

6655. තෙ නූන පුත්තකා මය්හං කපණාය වරාකියා,
පච්චුග්ගතා මං තිට්ඨන්ති අස්සමස්සාවිදූරතො.

6656. එකායනො එකපථො සරා සොබ්භා ච පස්සතො,
අඤ්ඤං මග්ගං න පස්සාමි යෙන ගච්ඡෙය්ය අස්සමං.

6657. මිගා නමත්ථු රාජානො කානනස්මිං මහබ්බලා,
ධම්මෙන භාතරො හොථ මග්ගං මෙ දෙථ යාචිතා.

6658. අවරුද්ධස්සහං භරියා රාජපුත්තස්ස සිරීමතො,
තඤ්චාහං නාතිමඤ්ඤාමි රාමං සීතාවනුබ්බතා.

6659. තුම්හෙ ච පුත්තෙ පස්සෙථ සායං සංවෙසනං පති,
අහඤ්ච පුත්තෙ පස්සෙය්යං ජාලිං කණ්හාජිනඤ්චුභො.