6334. යදි කෙචි මනුජා එන්ති අනුමග්ගෙ පටිපථෙ,
මග්ගං තෙ පටිපුච්ඡාම කුහිං වඞ්කතපබ්බතො.

6335. තෙ තත්ථ අම්හෙ පස්සිත්වා කරුණං පරිදෙවයුං,
දුක්ඛං තෙ පටිවෙදෙන්ති දූරෙ වඞ්කතපබ්බතො.

6336. යදි පස්සන්ති පවනෙ දාරකා ඵලිතෙ දුමෙ,
තෙසං ඵලානං හෙතූහි උපරොදන්ති දාරකා.

6337. රොදන්තෙ දාරකෙ දිස්වා උබ්බිග්ගා විපුලා දුමා,
සයමෙවොනමිත්වාන උපගච්ඡන්ති දාරකෙ.

6338. ඉදං අච්ඡෙරකං දිස්වා අබ්භුතං ලොමහංසනං,
සාධුකාරං පවත්තෙසි මද්දී සබ්බඞ්ගසොභනා.

6339. අච්ඡෙරං වත ලොකස්මිං අබ්භුතං ලොමහංසනං,
වෙස්සන්තරස්ස තෙජෙන සයමෙවොනතා දුමා.

6340. සඞ්ඛිපිංසු පථං යක්ඛා අනුකම්පාය දාරකෙ,
නික්ඛන්තදිවසෙනෙව චෙතරට්ඨං උපාගමුං.

6341. තෙ ගන්ත්වා දීඝමද්ධානං චෙතරට්ඨමුපාගමුං,
ඉද්ධං ඵීතං ජනපදං බහුමංසසුරොදනං.

6342. චෙතියා පරිකරිංසු දිස්වා ලක්ඛණමාගතං,
සුඛුමාලී වතයං අය්යා පත්තිකා පරිධාවති.

6343. වය්හාහි පරියායිත්වා සිවිකාය ච ඛත්තියා,
සාජ්ජ මද්දී අරඤ්ඤස්මිං පත්තිකා පරිධාවති.

6344. තං දිස්වා චෙතපාමොක්ඛා රොදමානා උපාගමුං,
කච්චින්නු දෙව කුසලං කච්චි දෙව අනාමයං;
කච්චි පිතා අරොගා තෙ සිවීනඤ්ච අනාමයං.

6345. කො තෙ බලං මහාරාජ කොනු තෙ රථමණ්ඩලං,
අනස්සකො අරථකො දීඝමද්ධානමාගතො;
කච්චි නාමිත්තෙහි පකතො අනුප්පත්තොසිමං දිසං.

6346. කුසලං චෙව මෙ සම්මා අථො සම්මා අනාමයං,
අථො පිතා අරොගො මෙ සිවීනඤ්ච අනාමයං.

6347. අහං හි කුඤ්ජරං දප්පං ඊසාදන්තං උරූළ්හවං,
ඛෙත්තඤ්ඤුං සබ්බයුද්ධානං සබ්බසෙතං ගජුත්තමං.

6348. පණ්ඩුකම්බලසඤ්ඡන්නං පභින්නං සත්තුමද්දනං,
දන්තිං සවාළවීජනිං සෙතං කෙලාසසාදිසං.

6349. සසෙතච්ඡත්තං සඋපථෙය්යං සාථබ්බනං සහත්ථිපං,
අග්ගයානං රාජවාහිං බ්රාහ්මණානං අදාසහං,

6350. තස්මිං මෙ සිවයො කුද්ධා පිතා ච අපහතො මනො,
අවරුද්ධති මං රාජා වඞ්කං ගච්ඡාමි පබ්බතං;
ඔකාසං සම්මා ජානාථ වනෙ යත්ථ වසාමසෙ.

6351. ස්වාගතන්තෙ මහාරාජ අථො තෙ අදුරාගතං,
ඉස්සරොසි අනුප්පත්තො යං ඉධත්ථි පවෙදය,

6352. සාකං භිසං මධුං මංසං සුද්ධං සාලීනමොදනං,
පරිභුඤ්ජ මහාරාජ පාහුනො නොසි ආගතො.