6833. තෙසං සුත්වාන නිග්ඝොසං භීතො වෙස්සන්තරො අහු,
පබ්බතං අභිරූහිත්වා භීතො සෙනං උදික්ඛති.

6834. ඉඞ්ඝ මද්දි නිසාමෙහි නිග්ඝොසො යාදිසො වනෙ,
ආජානීයා හසිස්සන්ති ධජග්ගානි ච දිස්සරෙ.

6835. ඉමෙ නූන අරඤ්ඤස්මිං මිගසඞ්ඝානි ලුද්දකා,
වාගුරාහි පරික්ඛිප්ප සොබ්භං පාතෙත්වා තාවදෙ;
වික්කොසමානා තිප්පාහි හන්ති නෙසං වරං වරං.

6836. යථා මයං අදූසකා අරඤ්ඤෙ අවරුද්ධකා,
අමිත්තහත්ථත්ථගතා පස්ස දුබ්බලඝාතකං.

6837. අමිත්තා නප්පසහෙය්යුං අග්ගීව උදකණ්ණවෙ,
තදෙව ත්වං විචින්තෙහි අපි සොත්ථි ඉතො සියා.

6838. තතො වෙස්සන්තරො රාජා ඔරොහිත්වාන පබ්බතා,
නිසීදි පණ්ණසාලයං දළ්හං කත්වාන මානසං.

6839. නිවත්තයිත්වාන රථං වොත්ථාපෙත්වාන සෙනියො,
එකං අරඤ්ඤෙ විහරන්තං පිතා පුත්තං උපාගමී.

6840. හත්ථික්ඛන්ධතො ඔරුය්හ එකංසො පඤ්ජලීකතො,
පරික්ඛිත්තො අමච්චෙහි පුත්තං සිඤ්චිතුමාගමි.

6841. තත්ථද්දස කුමාරං සො රම්මරූපං සමාහිතං,
නිසින්නං පණ්ණසාලායං ඣායන්තං අකුතොභයං.

6842. තඤ්ච දිස්වාන ආයන්තං පිතරං පුත්තගිද්ධිනං,
වෙස්සන්තරො ච මද්දී ච පච්චුග්ගන්ත්වා අවන්දිසුං.

6843. මද්දී ච සිරසා පාදෙ සසුරස්සාභිවාදයි,
මද්දී අහං හි තෙ දෙව පාදෙ වන්දාමි තෙ හුසා,
තෙසු තත්ථ පලිස්සජ්ජ පාණිනා පරිමජ්ජථ.

6844. කච්චි වො කුසලං පුත්ත කච්චි පුත්ත අනාමයං,
කච්චි උඤ්ඡෙන යාපෙථ කච්චි මූලඵලාබහූ.

6845. කච්චි ඩංසා ච මකසා ච අප්පමෙව සිරිංසපා,
වනෙ වාලමිගාකිණ්ණෙ කච්චි හිංසා න විජ්ජති.

6846. අත්ථි නො ජීවිකා දෙව යා ච යාදිසි කීදිසා,
කයිරා හි ජිවිකා හොම උඤ්ඡාචරියාය ජීවිකං.

6847. අනිද්ධිනං මහාරාජ දමෙතස්සංව සාරථි,
ත්යම්හා අනිද්ධිකා දන්තා අසමිද්ධි දමෙති නො.

6848. අපි නො කිසානි මංසානි පිතු මාතු අදස්සනා,
අවරුද්ධානං මහාරාජ අරඤ්ඤෙ ජීවසොකිනං.

6849. යෙ පි තෙ සිවිසෙට්ඨස්ස දායාදප්පත්තමානසා,
ජාලී කණ්හාජිනාචුභො බ්රාහ්මණස්ස වසානුගා;
අච්චායිකස්ස ලුද්දස්ස යො නෙ ගාවොව සුම්භති.

6850. තෙ රාජපුත්තියා පුත්තෙ යදි ජානාථ සංසථ,
පරියාපුණාථ නො ඛිප්පං සප්පදට්ඨංව මාණවං.

6851. උභො කුමාරා නික්කීතා ජාලී කණ්හාජිනා චුභො,
බ්රාහ්මණස්ස ධනං දත්වා පුත්ත මා භායි අස්සස.