4196. කස්මා තුවං රසක එදිසානි
කරොසි කම්මානි සුදාරුණානි,
හනාසි ඉත්ථි පුරිසෙ ච මූළ්හො
මංසස්ස හෙතු ආදු ධනස්ස කාරණා

4197. න අත්තහෙතු න ධනස්ස කාරණා
න පුත්තදාරස්ස සහායඤාතිනං,
භත්තා ච මෙ භගවා භූමිපාලො
සො ඛාදතී මංසං භදන්තෙ එදිසං.

4198. සචෙ තුවං භත්තුරත්ථෙ පයුත්තො
කරොසි කම්මානි සුදාරුණානි,
පාතො ච අන්තෙපුරං පාපුණිත්වා
ලපෙය්යාසි මෙ රාජිනො සම්මුඛෙ තං.

4199. තථා කරිස්සාමි අහං භදන්තෙ
යමෙව ත්වං භාසසි කාළහත්ථි,
පාතො ව අන්තෙපුරං පාපුණිත්වා
වක්ඛාමි තෙ රාජිනො සම්මුඛෙ තං.

4200. තතො රත්යා විවසනෙ සුරියස්සුග්ගමනං පති,
කාළො රසකමාදාය රාජානං උපසඞ්කමි
උපසඞ්කමිත්වා රාජානං ඉදං වචනමබ්රුවී.

4201. සච්චං කිර මහාරාජ රසකො පෙසිතො තයා,
හනාති ඉත්ථි පුරිසෙ තුවං මංසානි ඛාදසි.

4202. එවමෙවං තථා කාළ රසකො පෙසිතො මයා,
මම අත්ථං කරොන්තස්ස කිමෙතං පරිභාසසි.

4203. ආනන්දො සබ්බමච්ඡානං ඛාදිත්වා රසගිද්ධිමා,
පරික්ඛීණාය පරිසාය අත්තානං ඛාදියා මතො.

4204. එවං පමත්තො රසගාරවෙ රතො
බලො යදි ආයතිං නාවබුජ්ඣති,
විධම්ම පුත්තො චජි ඤාතකෙ ච
පරිවත්තිය අත්තානමෙව ඛාදති.

4205. ඉදං තෙ සුත්වාන විහෙතු ඡන්දො
මා භක්ඛසි රාජ මනුස්සමංසං,
මා ත්වං ඉමං කෙවලං වාරිජොව
දිපදාධිප සුඤ්ඤමකාසි රට්ඨං.

4206. සුජාතො නාම නාමෙන ඔරසො තස්ස අත්රජො,
ජම්බුපෙසිං අලද්ධාන මතො සො තස්ස සඞ්ඛයෙ.

4207. එවමෙව අහං කාළ භුත්වා භක්ඛං රසුත්තතමං,
අලද්ධා මානුසං මංසං මඤ්ඤෙ හෙස්සාමි ජීවිතං.

4208. මාණව අභිරූපොසි කුලෙ ජාතොසි සොත්ථියෙ,
න ත්වං අරහසි තාත අභක්ඛං භක්ඛයෙතවෙ.

4209. රසානමඤ්ඤතරං එතං යස්මා මං ත්වං නිවාරයෙ,
සොහං තත්ථ ගමිස්සාමි යත්ථ ලච්ඡාමි එදිසං.

4210. සො වාහං නිප්පතිස්සාමි න තෙ වච්ඡාමි සන්තිකෙ,
යස්ස මෙ දස්සනෙන ත්වං නාභිනන්දසි බ්රාහ්මණ.

4211. අද්ධා අඤ්ඤෙපි දායාදෙ පුත්තෙ ලච්ඡාම මාණව,
ත්වඤ්ච ජම්ම විනස්සස්සු යත්ථ පත්තං න තං සුණෙ.

4212. එවමෙව තුවං රාජ දිපදින්ද සුණොහි මෙ,
පබ්බාජෙස්සන්ති තං රට්ඨා සොණ්ඩං මාණවකං යථා.

4213. සුජාතො නාම නාමෙන භාවීතත්තාන සාවකො,
අච්ඡරං කාමයන්තොව න සො භුඤ්ජි න සො පිවි.

4214. කුසග්ගෙ උදකමාදාය සමුද්දෙ උදකං මිනෙ,
එවං මානුසකා කාමා දිබ්බකාමාන සන්තිකෙ.

4215. එවමෙව අහං කාළ භුත්වා භක්ඛං රසුත්තතමං,
අලද්ධා මානුසං මංසං මඤ්ඤෙ හෙස්සාමි ජීවිතං.

4216. යථාපි තෙ ධතරට්ඨා හංසා වෙහාසයං ගමා,
අවුත්තිපරිභොගෙන සබ්බෙ අබ්භත්ථතං ගතා.