227. සීහඞ්ගුලි සීහනඛො සීහපාදපතිට්ඨිතො,
සො සීහො සීහසඞ්ඝම්භි එකො නදති අඤ්ඤථා.
228. මා ත්වං නදී රාජපුත්ත අප්පසද්දො වනෙ වස,
සරෙන ඛො තං ජානෙය්යුං න හි තෙ පෙත්තිකො සරො’ති
8. සීහකොත්ථුකජාතකං.
229. නෙතං සීහස්ස නදිතං න ව්යග්ඝස්ස න දීපිනො,
පාරුතො සීහචම්මෙන ජම්මො නදති ගද්රභො.
230. චිරම්පි ඛො තං ඛාදෙය්ය ගද්රභො හරිතං යවං,
පාරුතො සීහචම්මෙන රවමානොව දූසයී’ති.
9. සීහචම්මජාතකං.
231. පස්ස සද්ධාය සීලස්ස චාගස්ස ච අයං ඵලං,
නාගො නාවාය වණ්ණෙන සද්ධං වහති උපාසකං.
232. සබ්භිරෙව සමාසෙථ සබ්භි කුබ්බෙථ සන්ථවං,
සතං හි සන්නිවාසෙන සොත්ථිං ගච්ඡති නහාපිතො’ති.
10. සීලානිසංසජාතකං.
අසදිසවග්ගො චතුත්ථො.
තස්සුද්දානං:
ධනුග්ගහකුඤ්ජරඅප්පරසො
ගිරිදත්තමනාවිලචිත්තවරං,
දධිවාහනජම්බුකසීහනඛො
හරිතයවනාගවරෙන දස.
5. රුහකවග්ගො
233. අම්භො රුහක ඡින්නාපි ජියා සන්ධීයතෙ පුන,
සන්ධීයස්සු පුරාණියා මා කොධස්ස වසං ගමි.
234. විජ්ජමානාසු මරුවාසු විජ්ජමානෙසු කාරුසු,
අඤ්ඤං ජියං කරිස්සාම අලඤ්ඤෙව පුරාණියා’ති.
1. රුහකජාතකං.
235. ඉත්ථි සියා රූපවතී සා ච සීලවතී සියා,
පුරිසො තං න ඉච්ඡෙය්ය සද්දහාසි මහොසධ.
236. සද්දහාමි මහාරාජ පුරිසො දුබ්භගො සියා,
සිරී ච කාලකණ්ණි ච න සමෙන්ති කුදාචනන්ති.
2. සිරිකාලකණ්ණි ජාතකං.
237. අයමෙව සා අහම්පි සො අනඤ්ඤො
අයමෙව සො හත්ථච්ඡින්නො අනඤ්ඤො
යමාහ කොමාරපතී මමන්ති
වජ්ඣිත්ථියො නත්ථි ඉත්ථිසු සච්චං.
238. ඉමඤ්ච ජම්මං මුසලෙන හන්ත්වා
ලුද්දං ඡවං පරදාරූපසෙවිං,
ඉමිස්සා ච නං පාපපතිබ්බතාය
ජීවන්තියා ඡින්දථ කණ්ණනාසන්ති.
3. චුල්ලපදුමජාතකං.
239. න සන්ති දෙවා පවසන්ති නූන
නහ නූන සන්ති ඉධ ලොකපාලා,
සහසා කාරොන්තානං අසඤ්ඤතානං.
නහ නූන සන්ති පටිසෙධිතාරො.