3223. අරියාවකාසොපි පසන්නනෙත්තො
මඤ්ඤෙ භවං පබ්බජිතො කුලම්භා,
කථන්නු චිත්තානි පහාය භොගෙ
පබ්බජි නික්ඛම්ම ඝරා සපඤ්ඤ.

3224. සයං විමානං නරදෙව දිස්වා
මහානුභාවස්ස මහොරගස්ස,
දිස්වාන පුඤ්ඤාන මහාවිපාකං
සද්ධායහං පබ්බජිතොම්හි රාජ.

3225. න කාමකාමා න භයා න දොසා
වාචං මුසා පබ්බජිතා භණන්ති,
අක්ඛාහි මෙ පුච්ඡිතො එතමත්ථං
සුත්වාන මෙ ජායිහිතිප්පසාදො.

3226. වාණිජ්ජ රට්ඨාධිප ගච්ඡමානො
පථෙ අද්දසාසිම්හි මිලාචපුත්තෙ,
පවඩ්ඪකායං උරගං මහන්තං
ආදාය ගච්ඡන්තෙ පමොදමානෙ.

3227. සොහං සමාගම්ම ජනින්ද තෙහි
සංහට්ඨලොමො අවචස්මිං භීතො,
කුහිං අයං නීයති භීමකායො
නාගෙන කිං කාහථ භොජපුත්තා.

3228. නාගො අයං නීයති භොජනත්ථං
පවඩ්ඪකායො උරගො මහන්තො,
සාදුඤ්ච ථූලඤ්ච මුදුඤ්ච මංසං
න ත්වං රසඤ්ඤාසි විදෙහපුත්ත.

3229. ඉතො මයං ගන්ත්වා සකං නිකෙතං
ආදාය සත්ථානි විකොපයිත්වා,
මංසානි භොක්ඛාම පමොදමානා
මයං හි වෙ සත්තවො පන්නගානං.

3230. සචෙ අයං නීයති භොජනත්ථං
පවඩ්ඪකායො උරගො මහන්තො,
දදාමි වො බලිවද්දානි සොළස
නාගං ඉමං මුඤ්චථ බන්ධනස්මා.

3231. අද්ධා හි නො භක්ඛො අයං මනාපො
බහූ ච නො උරගා භුත්තපුබ්බා,
කරොම තෙ තං වචනං අළාර
මිත්තඤ්ච නො හොහි විදෙහපුත්ත.

3232. තදස්සු තෙ බන්ධනා මොචයිංසු
යං නත්ථුතො පටිමොක්ඛස්ස පාසෙ,
මුත්තො ච සො බන්ධනා නාගරාජා
පක්කාමි පාචීනමුඛො මුහුත්තං

3233. ගන්ත්වාන පාචීනමුඛො මුහුත්තං
පුණ්ණෙහි නෙත්තෙහි පලොකයී මං,
තදස්සහං පිට්ඨිතො අන්වගච්ඡිං
දසඞ්ගුලිං අඤ්ජලිං පග්ගහෙත්වා.

3234. ගච්ඡෙව ඛො ත්වං තරමානරූපො
මා තං අමිත්තා පුනරග්ගහෙසුං,
දුක්ඛො හි ලුද්දෙහි පුනා සමාගමො
අදස්සනං භොජපුත්තාන ගච්ඡ.

3235. අගමාසි සො රහදං විප්පසන්නං
නීලොභාසං රමණීයං සුතිත්ථං,
සමොතතං ජම්බූහි චෙතසාහි
පාවෙක්ඛි නිත්තිණ්ණභයො පතීතො

3236. සො තං පවිස්ස න චිරස්ස නාගො
දිබ්බෙන මෙ පාතුරහූ ජනින්ද,
උපට්ඨහි මං පිතරං ව පුත්තො
හදයඞ්ගමං කණ්ණසුඛං භණන්තො

3237. ත්වංමෙසි මාතා ච පිතා අළාර
අබ්භන්තරො පාණදදො සහායො,
සකඤ්ච ඉද්ධිං පටිලාභිතොස්මි
අළාර පස්ස මෙ නිවෙසනානි
පහූතභක්ඛං බහු අන්නපානං
මසක්කසාරං විය වාසවස්ස.

3238. තං භූමිභාගෙහි උපෙතරූපං
අසක්ඛරා චෙව මුදූ සුභා ච,
නීචතිණා අප්පරජා ච භූමි
පාසාදිකා යත්ථ ජහන්ති සොකං.

3239. අනාවකූලා වෙළුරියූපනීලා
චාතුද්දිසං අම්බවනං සුරම්මං,
පක්කා ච පෙසී ච ඵලා සුඵුල්ලා
නිච්චොතුකා ධාරයන්තී ඵලානි