3275. ආමන්තයාමි නිගමං
මිත්තාමච්චෙ පාරිසජ්ජෙ ච,
සිරස්මිං පලිතං ජාතං
පබ්බජ්ජං දානි රොච’හං.

3276. අභුං මෙ කථන්නු භණසි
සල්ලං මෙ දෙව උරසි කප්පෙසි,
සත්තසතා තෙ භරියා
කථන්නු තෙ තා භවිස්සන්ති.

3277. පඤ්ඤායිහින්ති එතා
දහරා අඤ්ඤම්පි තා ගමිස්සන්ති,
සග්ගඤ්ච පත්ථයානො
තෙනා’හං පබ්බජිස්සාමි.

3278. දුල්ලද්ධං මෙ ආසි සුතසොම
යස්ස තෙ හොමහං මාතා,
යං මෙ විලපන්තියා
අනපෙක්ඛො පබ්බජසි දෙව.

3279. දුල්ලද්ධං මෙ ආසි සුතසොම
යන්තං අහං විජායිස්සං,
යං මෙ විලපන්තියා
අනපෙක්ඛො පබ්බජසි දෙව.

3280. කොනාමෙසො ධම්මො සුතසොම
කා ච නාම පබ්බජ්ජා,
යං නො අම්හෙ ජිණ්ණො
අනපෙක්ඛො පබ්බජසි දෙව.

3281. පුත්තාපි තුය්හං බහවො
දහරා අප්පත්තයොබ්බනා,
මඤ්ජූ තෙ තං අපස්සන්තා
මඤ්ඤෙ දුක්ඛං නිගච්ඡන්ති.

3282. පුත්තෙහි ච මෙ එතෙහි
දහරෙහි අප්පත්තයොබ්බනෙහි,
මඤ්ජූහි සබ්බෙහිපි තුම්හෙහි
චිරම්පි ඨත්වා විනාභාවො.

3283. ඡින්නං නු තුය්හං හදයං
ආදු කරුණා ච නත්ථි අම්හෙසු,
යං නො වික්කන්දත්තියො
අනපෙක්ඛො පබ්බජසි දෙව.

3284. න ච මය්හං ඡින්නං හදයං
අත්ථි කරුණාපි මය්හං තුම්හෙසු,
සග්ගඤ්ච පත්ථයානො
තෙනාහං පබ්බජිස්සාමි.

3285. දුල්ලද්ධං මෙ ආසි සුතසොම
යස්ස තෙ අහං භරියා,
යං මෙ විලපන්තියා
අනපෙක්ඛො පබ්බජසි දෙව.

3286. දුල්ලද්ධං මෙ ආසි සුතසොම
යස්ස තෙ අහං භරියා,
යං මෙ කුච්ඡිපටිසන්ධිං
අනපෙක්ඛො පබ්බජසි දෙව.

3287. පරිපක්කො මෙ ගබ්භො
කුච්ඡිගතො යාව නං විජායාමි,
මාහං එකො විධවා
පච්ඡා දුක්ඛානි අද්දක්ඛිං.

3288. පරිපක්කො තෙ ගබ්භො
කුච්ඡිගතො ඉඞ්ඝ ත්වං විජායස්සු,
පුත්තං අනොමවණ්ණං
තං හිත්වා පබ්බජිස්සාමි.

3289. මා ත්වං චන්දෙ රුදි
මා සොචි වනතිමිරමත්තක්ඛි,
ආරොහ වරපාසාදං
අනපෙක්ඛො අහං ගමිස්සාමි.

3290. කො තං අම්ම කොපෙසි
කිං රොදසි පෙක්ඛසි ච මං බාළ්හං,
කං අවජ්ඣං ඝාතෙමි
ඤාතීනං උදික්ඛමානානං.