2809. කින්නු සොචසි අනුච්චඞ්ගී පණ්ඩූසි වරවණ්ණිනි,
මිලායසි විසාලක්ඛි මාලාව පරිමද්දිතා.

2810. දොහළො මෙ මහාරාජ සුපිනන්තෙනුපච්චගා,
න සො සුලභරූපොව යාදිසො මම දොහළො.

2811. යෙ කෙචි මානුසා කාමා ඉධ ලොකස්මිං නන්දනෙ,
සබ්බෙ තෙ පචුරා මය්හං අහන්තෙ දම්මි දොහළං.

2812. ලුද්දා ද්වෙ සමායන්තු යෙ කෙචි විජිතෙ තව,
එතෙසං අහමක්ඛිස්සං යාදිසො මම දොහළො.

2813. ඉමෙ තෙ ලුද්දකා දෙවි කතහත්ථා විසාරදා,
වනඤ්ඤු ච මිගඤ්ඤූ ච මමත්ථෙ චත්තජීවිතා.

2814. ලුද්දපුත්තා නිසාමෙථ යාවන්තෙත්ථ සමාගතා,
ඡබ්බිසාණං ගජං සෙතං අද්දසං සුපිනෙ අහං,
තස්ස දන්තෙහි මෙ අත්ථො අලාභෙ නත්ථි ජීවිතං.

2815. න නො පිතූනං න පිතාමහානං
දිට්ඨො සුතො කුඤ්ජරො ඡබ්බිසාණො,
යමද්දසා සුපිනෙ රාජපුත්ති
අක්ඛාහි නො යාදිසො හත්ථිනාගො.

2816. දිසා චතස්සො විදිසා චතස්සො
උද්ධං අධො දසදිසා ඉමායො,
කතමං දිසං තිට්ඨති නාගරාජා
යමද්දසා සුපිනෙ ඡබ්බිසාණං.

2817. ඉතො උජුං උත්තරියං දිසායං
අතික්කම්ම සො සත්ත ගිරී බ්රහන්තෙ,
සුවණ්ණපස්සො නාම ගිරී උළාරො
සුපුප්ඵිතො කිම්පුරිසානුචිණ්ණො.

2818. ආරුය්හ සෙලං භවනං කින්නරානං
ඔලොකය පබ්බතපාදමූලං,
අථ දක්ඛසි මෙඝසමානවණ්ණං
නිග්රොධරාජං අට්ඨසහස්සපාදං.

2819. තත්ථච්ඡති කුඤ්ජරො ඡබ්බිසාණො
සබ්බසෙතො දුප්පසෙහො පරෙහි,
රක්ඛන්ති නං අට්ඨසහස්සනාගා
ඊසාදන්තා වාතජවප්පහාරිනො.

2820. තිට්ඨන්ති තෙ තුමුලං පස්සසන්තා
කුප්පන්ති වාතස්සපි එරිතස්ස,
මනුස්සභූතං පන තත්ථ දිස්වා
භස්මං කරෙය්යුං නාස්ස රජොපි තස්සාති.

2821. බහූ හි මෙ රාජකුලම්භි සන්ති
පිළන්ධනා ජාතරූපස්ස දෙවි,
මුත්තා මණීවෙළුරියාමයා ච
කිං කාහසි දන්තපිළන්ධනෙන,
මාරෙතුකාමා කුඤ්ජරං ඡබ්බිසාණං
උදාහු ඝාතෙස්සසි ලුද්දපුත්තෙ.

2822. සා ඉස්සිතා දුක්ඛිතා චස්මි ලුද්ද
උද්ධඤ්ච සුස්සාමි අනුස්සරන්තී,
කරොහි මෙ ලුද්දක එතමත්ථං
දස්සාමි තෙ ගාමවරානි පඤ්ච.

2823. කත්ථච්ඡති කත්ථමුපෙති ඨානං
වීථිස්ස කා නහානගතස්ස හොති,
කථඤ්හි සො නහායති නාගරාජා
කථං විජානෙමු ගතිං ගජසස.

2824. තත්ථෙව සා පොක්ඛරණී අදූරෙ
රම්මා සුතිත්ථා ච මහොදිකා ච,
සම්පුප්ඵිතා භමරගණානුචිණ්ණා
එත්ථ හි සො නහායති නාගරාජා.

2825. සීසං නහාතො උප්පලමාලධාරී
සබ්බසෙතො පුණ්ඩරීකත්තචඞ්ගී,
ආමොදමානො ගච්ඡති සන්තිකෙ තං
පුරක්ඛත්වා මහෙසිං සබ්බභද්දං.

2826. තත්ථෙව සො උග්ගහෙත්වාන වාක්යං
ආදාය තුණිඤ්ච ධනුඤ්ච ලුද්දො,
විතුරිය සො සත්ත ගිරී බ්රහන්තෙ
සුවණ්ණපස්සං නාම ගිරිං උළාරං.