2850. රජ්ජඤ්ච පටිපන්නස්මා ආධිපච්චං සුචීරත,
මහත්තං පත්තුමිච්ඡාමි විජෙතුං පඨවිං ඉමං.

2851. ධම්මෙන නො අධම්මෙන අධම්මො මෙ න රුච්චති,
කිච්චොව ධම්මො චරිතො රඤ්ඤො හොති සුචීරත.

2852. ඉධ චෙවානින්දිතා යෙන පෙච්ච යෙන අනින්දිතා,
යසං දෙවමනුස්සෙසු යෙන පප්පෙමු බ්රාහ්මණ.

2853. යොහං අත්ථඤ්ච ධම්මඤ්ච කත්තුමිච්ඡාමි බ්රාහ්මණ,
තං ත්වං අත්ථඤ්ච ධම්මඤ්ච බ්රාහ්මණක්ඛාහි පුච්ඡිතො

2854. නාඤ්ඤත්ර විධුරා එතදක්ඛාතුමරහති,
යං ත්වං අත්ථඤ්ච ධම්මඤ්ච කත්තුමිච්ඡසි ඛත්තිය.

2855. එහි ඛො පහිතො ගච්ඡ විධුරස්ස උපන්තිකං
නික්ඛං රත්තසුවණ්ණස්ස හරං ගච්ඡ සුචීරත,
අභිහාරං ඉමං දජ්ජා අත්ථධම්මානුසිට්ඨියා.

2856. ස්වාධිප්පාගා භාරද්වාජො විධුරස්ස උපන්තිකං,
තමද්දස මහාබ්රාහ්මා අසමානං සකෙ ඝරෙ.

2857. රඤ්ඤොහං පහිතො දූතො කොරව්යස්ස යසස්සිනො,
අත්ථං ධම්මඤ්ච පුච්ඡෙසි ඉච්චබ්රවි යුධිට්ඨිලො
තං ත්වං අත්ථඤ්ච ධම්මඤ්ච විධුරක්ඛාහි පුච්ඡිතො.

2858. මඞ්ගං මෙ පිදහිස්සන්ති න තං සක්කොමි බ්රාහ්මණ,
අපිධෙතුං මහාසින්ධුං තං කථං සො භවිස්සති
න තෙ සක්කොමි අක්ඛාතුං අත්ථං ධම්මඤ්ච පුච්ඡිතො.

2859. භද්රකාරො ච මෙ පුත්තො ඔරසො මම අත්රජො,
තං ත්වං අත්ථඤ්ච ධම්මඤ්ච ගන්ත්වා පුච්ඡස්සු බ්රාහ්මණ.

2860. ස්වාධිප්පාගා භාරද්වාජො භද්රකාරස්ස සන්තිකං,
තමද්දස මහාබ්රහ්මා නිසින්නං සම්හි වෙස්මනි.

2861. රඤ්ඤොහං පහිතො දූතො කොරව්යස්ස යසස්සිනො,
අත්ථං ධම්මඤ්ච පුච්ඡෙසි ඉච්චබ්රවි යුධිට්ඨිලො
තං ත්වං අත්ථඤ්ච ධම්මඤ්ච භද්රකාර බ්රවීහි මෙ.