2713. කිං ඡන්දො කිමධිප්පායො එකො සම්මසි ඝම්මනි,
කිං පත්ථයානො කිං එසං කෙන අත්ථෙන බ්රාහ්මණ.

2714. යථා මහාවාරිධරො කුම්භො සුපරිනාභවා,
තථූපමං අම්බපක්කං වණ්ණගන්ධරසුත්තමං.

2715. තං වුය්හමානං සොතෙන දිස්වානාමලමජ්ඣිමෙ,
පාණීහි නං ගහෙත්වාන අග්යායතනමාහරිං.

2716. තතො කදලිපත්තෙසු නික්ඛිපිත්වා සයං අභං,
සත්ථෙන නං විකප්පෙත්වා ඛුප්පිපාසං අහාසි මෙ.

2717. සොහං අපෙතදරථො ව්යන්තීභූතො දුඛක්ඛමො,
අස්සාදං නාධිගච්ඡාමි ඵලෙසවඤ්ඤෙසු කෙසුපි.

2718. සොසෙත්වා නූන මරණං තං මමං ආවහිසස්ති,
අම්බං යස්ස ඵලං සාදුං මධුරග්ගං මනොරමං
යමුද්ධරිං වුය්හමානං උදධිස්මා මහණ්ණවෙ.

2719. අක්ඛාතං තෙ මයා සබ්බං යස්මා උපවසාමහං,
රම්මං පතිනිසින්නොස්මි පුථුලොමායුතා පුථු.

2720. ත්වං ච ඛො මෙ අක්ඛාසි අත්තානමපලායිනී,
කා වා ත්වමසි කල්යාණි කිස්ස වා ත්වං සුමජ්ඣිමෙ.

2721. රුප්පපට්ටපළිමට්ඨීව ව්යග්ඝිව ගිරිසානුජා,
යා සන්නි නාරියො දෙවෙසු දෙවානං පරිචාරිකා,

2722. යාව මනුස්සලොකස්මිං රූපෙනත්වාගතිත්ථීයො,
රූපෙ තෙ සාදිසී නත්ථි දෙවෙසු ගන්ධබ්බමනුස්සලොකෙ,
ඵුටඨාසි මෙ චාරුපුබ්බඞ්ගි බ්රූහි
අක්ඛාහි මෙ නාමඤ්ච බන්ධවෙ ච.

2723. යං ත්වං පතිනිසින්නොසි රම්මං බ්රාහ්මණ කොසිකිං,
සාහං භුසාලයාවුත්ථා වරවාරිවහොඝසා.

2724. නානාදුමගණාකිණ්ණා බහුතා ගිරිකන්දරා,
මමෙව පමුඛා හොන්ති අභිසන්දන්ති පාවුසෙ.

2725. අථො බහූ වනා තොදා නීලවාරිවහන්ධරා,
බහුකා නාගචිත්තොදා අභිසන්දන්ති වාරිනා.

2726. තා අම්බජම්බුලබුජා නීපා තාලා චුදුම්බරා,
බහූනි ඵලජාතානි ආවහන්ති අභිණ්හසො.

2727. යං කිඤ්චි උභතො තීරෙ ඵලං පතති අම්බුනි,
අසංසයං තං සොතස්ස ඵලං හොති වසානුගං.

2728. එතදඤ්ඤාය මෙධාවී පුථුපඤ්ඤ සුණොහි මෙ,
මා රොචයමභිසඞ්ගං පටිසෙධ ජනාධිප.

2729. න චාහං වද්ධවං මඤ්ඤෙ යං ත්වං රට්ඨාභිවද්ධන,
ආචෙය්යමානො රාජිසි මරණං අභිකඞ්ඛසි.

2730. තස්ස ජානන්ති පිතරො ගන්ධබ්බා ච සදෙවකා,
යෙ චාපි ඉසයො ලොකෙ සඤ්ඤතත්තා යසස්සිනො
අසංසයන්තෙ ජානන්ති වද්ධභූතා යසස්සිනො.

2731. එවං විදිත්වා විදූ සබ්බධම්මං
විද්ධංසනං චවනං ජීවිතස්ස,
නාචීයති තස්ස නරස්ස පාපං
සචෙ න චෙතෙති වධාය තස්ස.

2732. ඉසිපූගසමඤ්ඤාතෙ එවං ලොක්යා විදිතා සති,
අනරිය පරිසම්භාසෙ පාපකම්මං ජිගිංසසි.

2733. සචෙ අහං මරිස්සාමි තීරෙ තෙ පුථු සුස්සොණි,
අසංසයං අසිලොකො මයි පෙතෙ ආගමිස්සති.

2734. තස්මා හි පාපකං කම්මං රක්ඛස්සෙව සුමජ්ඣිමෙ,
මා තං සබ්බො ජනො පච්ඡා පකත්ථාසි මයි මතෙ.

2735. අඤ්ඤාතමෙතං අවිසය්හසාහි
අත්තානං අම්බං ච දදාමි තෙ තං,
යො දුච්චජෙ කාමගුණෙ පහාය
සන්තිඤ්ච ධම්මඤ්ච අධිට්ඨිතොසි.