2745. කො පාතුරාසි තිදිවා නභම්භි
ඔභාසයං සංවරිං චන්දිමාව,
ගත්තෙහි තෙ රස්මියො නිච්ඡරන්ති
සතෙරිතා විජ්ජුරිවන්තලික්ඛෙ.

2746. සො ඡින්නවාතං කමසි අඝම්භි
වෙහාසයං ගච්ඡසි තිට්ඨසී ච,
ඉද්ධී නු තෙ වත්ථුකතා සුභාවිතා
අනද්ධගුණමපි දෙවතානං.

2747. වෙහාසයං කමමාගම්ම තිට්ඨසි
කුම්භං කිණාථාති යමෙතමත්ථං,
කො වා තුවං කිස්ස වතාය කුම්භො
අක්ඛාහි මෙ බ්රාහ්මණ එතමත්ථං.

2748. න සප්පිකුම්භො නපි තෙලකුම්භො
න ඵාණිතස්ස න මධුස්ස කුම්භො,
කුම්භස්ස වජ්ජානි අනප්පකානි
දොසෙ බහූ කුම්භගතෙ සුණාථ.

2749. ගලෙය්ය යං පීත්වා පතෙ පපාතං
සොබ්භං ගුහං චන්දනියොළිගල්ලං,
බහුම්පි භුඤ්ජෙය්ය අභොජනෙය්යං
තස්සා පුණ්ණං කුම්භමිමං කිණාථ.

2750. යං වෙ පීත්වා චිත්තස්මිං අනෙසමානො
ආභිණ්ඩතී ගොරිව භක්ඛසාදී,
අනාථමානො උපගායති නච්චතී ච
තස්සා පුණ්ණං කුම්භමිමං කිණාථ.

2751. යං වෙ පීත්වා අචෙලකොව නග්ගො
චරෙය්ය ගාමෙ විසිඛන්තරානි
සම්මූළ්හචිත්තො අතිවෙලසායී
තස්සා පුණ්ණං කුම්භමිමං කිණාථ.

2752. යං වෙ පීත්වා වුට්ඨාය පවෙධමානො
සීසඤ්ච බාහුඤ්ච පසාරයන්තො,
සො නච්චති දාරුකටල්ලකොව
තස්සා පුණ්ණං කුම්භමිමං කිණාථ.

2753. යං වෙ පීත්වා අග්ගිදඩ්ඪා සයන්ති
අථො සිගාලෙහිපි ඛාදිතාසෙ,
බන්ධං වධං භොගජානිඤ්චුපෙන්ති
තස්සා පුණ්ණං කුම්භමිමං කිණාථ.

2754. යං වෙ පීත්වා භාසෙය්ය අභාසනෙය්යං
සහායමාසීනො අපෙතවත්ථො,
සම්මක්ඛිතො වන්තගතො ව්යසන්නො
තස්සා පුණ්ණං කුම්භමිමං කිණාථ.

2755. යං වෙ පීත්වා උක්කට්ඨො ආවිලක්ඛො
මමෙව සබ්බපඨවීති මඤ්ඤති,
න මෙ සමො සමො චාතුරන්තොපි රාජා
තස්සා පුණ්ණං කුම්භමිමං කිණාථ.

2756. මානාතිමානා කලහාති පෙසුනී
දුබ්බණ්ණිනී නග්ගියිනී පලායිනී,
චොරාන ධුත්තාන ගතී නිකෙතො
තස්සා පුණ්ණං කුම්භමිමං කිණාථ.

2757. ධඤ්ඤං ධනං රජතං ජාතරූපං
ඛෙත්තං ගවං යත්ථ විනාසයන්ති,
උච්ඡෙදනී විත්තවතං කුලානං
තස්සා පුණ්ණං කුම්භමිමං කිණාථ.

2758. ඉද්ධානි ඵීතානි කුලානි අස්සු
අනෙකසාහස්සධනානි ලොකෙ,
උච්ඡින්නදායජ්ජකතානිමාය
තස්සා පුණ්ණං කුම්භමිමං කිණාථ.

2759. යං පීත්වා දුට්ඨරූපොව පොසො
අක්කොසති පිතරං මාතරඤ්ච,
සස්සුම්පි ගණ්හෙය්ය අථොපි සුණ්හං
තස්සා පුණ්ණං කුම්භමිමං කිණාථ.

2760. යං වෙ පීත්වා දුට්ඨරූපාව නාරී
අක්කොසති සසුරං සාමිකඤ්ච,
දාසම්පි ගණ්හෙ පරිචාරකම්පි
තස්සා පුණ්ණං කුම්භමිමං කිණාථ.