2379. දූරෙ අපස්සං ථෙරොව චක්ඛුං යාචිතුමාගතො,
එකනෙත්තා භවිස්සාම චක්ඛුං මෙ දෙහි යාචිතො.

2380. කෙනානුසිට්ඨො ඉධමාගතොසි
වණිබ්බක චක්ඛුපථානු යාචිතුං,
සුදුච්චජං යාචසි උත්තමඞ්ගං
යාමාහු නෙත්තං පුරිසෙන දුච්චජං.

2381. යමාහු දෙවෙසු සුජම්පතීති
මඝවාති තං ආහු මනුස්සලොකෙ,
තෙනානුසිට්ඨො ඉධමාගතොස්මි
වණිබ්බකො චක්ඛුපථානි යාචිතුං.

2382. වණිබ්බතො මය්හං වණිං අනුත්තරං
දදාහි මෙ චක්ඛුපථානි යාචිතො,
දදාහි මෙ චක්ඛුපථං අනුත්තරං
යමාහු නෙත්තං පුරිසෙන දුච්චජං.

2383. යෙන අත්ථෙන ආගඤ්ඡි යමත්ථමභිපත්ථයං,
තෙ තෙ ඉජ්ඣන්තු සඞ්කප්පා ලභ චක්ඛූනි බ්රාහ්මණ.

2384. එකං තෙ යාචමානස්ස අභයානි දදාමහං
සචක්ඛුමා ගච්ඡ ජනස්ස පෙක්ඛතො,
යදිච්ඡසෙ ත්වං තං තෙ සමිජ්ඣතු.

2385. මා නො දෙව අදා චක්ඛුං මා නො සබ්බෙ පරාකරි,
ධනං දෙහි මහාරාජ පුත්තා වෙළුරියා බහූ.

2386. යුත්තෙ දෙව රථෙ දෙහි ආජානීයෙ චලඞ්කතෙ,
නාගෙ දෙහි මහාරාජ හෙමකප්පනවාසසෙ.

2387. යථා තං සිවයො සබ්බෙ සයොග්ගා සරථා සදා,
සමන්තා පරිකිරෙය්යුං එවං දෙහි රථෙසභ.

2388. යො වෙ දස්සන්ති වත්වාන අදානෙ කුරුතෙ මනො,
භුම්යා සො පතිතං පාසං ගීවාය පටිමුඤ්චති.

2389. යො වෙ දස්සන්ති වත්වාන අදානෙ කුරුතෙ මනො,
පාපා පාපතරො හොති සම්පත්තො යමසාධනං.

2390. යං හි යාචෙ තං හි දදෙ යං න යාචෙ න තං දදෙ,
ස්වාහං තමෙ ච දස්සාමි යං මං යාචති බ්රාහ්මණො.

2391. ආයුං නු වණ්ණං නු සුඛං බලං නු
කිං පත්ථයානො නු ජනින්ද දෙසි,
කථං හි රාජා සිවිනං අනුත්තරො
චක්ඛූනි දජ්ජා පරලොකහෙතු.

2392. නචාහමෙතං යසසා දදාමි
න පුත්තමිච්ඡෙ න ධනං න රට්ඨං,
සතඤ්ච ධම්මො චරිතො පුරාණො
ඉච්චෙව දානෙ රමතෙ මනො මමං.

2393. න මෙ දෙස්සා උභො චක්ඛූ අත්තානං මෙ න දෙස්සියං
සබ්බඤ්ඤුතං පියං මය්හං තස්මා චක්ඛුං අදාසහං.

2394. සඛා ච මිත්තො ච මමාසි සීවක
සුසික්ඛිතො සාධු කරොහි මෙ වචො,
උද්ධත්ව චක්ඛූනි මමං ජිගිංසතො
හත්ථෙසු ආවෙසි වණිබ්බකස්ස.

2395. චොදිතො සිවිරාජෙන සීවකො වචනංකරො,
රඤ්ඤො චක්ඛූනි උද්ධත්වා බ්රාහ්මණස්සුපනාමයි
සචක්ඛු බ්රාහ්මණො ආසි අන්ධො රාජා උපාවිසි.