1898. තස්ස ගාමවරං දම්මි නාරියො ච අලඞ්කතා,
කො මෙ තං මිගමක්ඛාති මිගානං මිගමුත්තමං.

1899. මය්හං ගාමවරං දෙහි නාරියො ච අලඞ්කතා,
අහං තෙ මිගමක්ඛිස්සං මිගානං මිගමුත්තමං.

1900. එතස්මිං වනසණ්ඩස්මිං අම්බා සාලා ච පුප්ඵිතා,
ඉන්දගොපකකසංඡන්නා එත්ථෙසො තිට්ඨතී මිගො.

1901. ධනුං අදෙජ්ඣං කත්වාන උසුං සන්ධායුපාගමි,
මිගො ච දිස්වා රාජානං දූරතො අජ්ඣභාසථ.

1902. ආගමෙහි මහාරාජ මා මං විජ්ඣි රථෙසභ.
කො නු තෙ ඉදමක්ඛාසි එත්ථෙසො තිට්ඨතී මිගො.

1903. එස පාපචරො පොසො සම්ම තිට්ඨති ආරකා,
සො හි මෙ ඉදමක්ඛාසි එත්ථෙසො තිට්ඨතී මිගො.

1904. සච්චං කිරෙව මාහංසු නරා එකච්චියා ඉධ,
කට්ඨං විපලාවිතං සෙය්යො නත්වෙවෙකච්චියො නරො.

1905. කින්නු රුරූ ගරහසි මිගානං
කිං පක්ඛිනං කිං පන මානුසානං,
භයං හි මං වින්දති නප්පරූපං
සුත්වානං තං මානුසිං භාසමානං.

1906. යමුද්ධරිං වහනෙ වුය්හමානං
මහොදකෙ සලිලෙ සීඝසොතෙ,
තතො නිදානං භයමාගතං මම
දුක්ඛො භවෙ රාජ අසබ්භිසඞ්ගමො.

1907. සොහං චතුප්පත්තමිදං විහඞ්ගමං
තනුච්ඡිදං හදයෙ ඔස්සජාමි,
හනාමි මිත්තදදුමකිච්චකාරිං
යො තාදිසං කම්මකතං න ජානෙ.

1908. ධීරස්ස බාලස්ස හවෙ ජනින්ද
සන්තො වධං නප්පසංසන්ති ජාතු,
කාමං ඝරං ගච්ඡතු පාපධම්මො
යඤ්චස්ස භට්ඨං තදෙතස්ස දෙහි
අහඤ්ච තෙ කාමකරො භවාමි.

1909. අද්ධා රුරූ අඤ්ඤතරො සතං සෙ
යො දුබ්භතො මානුසස්ස න දුබ්භි,
කාමං ඝරං ගච්ඡතු පාපධම්මො
යඤ්චස්ස භට්ඨං තදෙතස්ස දම්මි
අහඤ්ච තෙ කාමචාරං දදාමි.

1910. සුවිජානං සිගාලානං සකුන්තානඤ්ච වස්සිතං,
මනුස්සවස්සිතං රාජ දුබ්බිජානතරං තතො.

1911. අපි චෙ මඤ්ඤති පොසො ඤාති මිත්තො සඛාති වා,
යො පුබ්බෙ සුමනො හුත්වා පච්ඡා සම්පජ්ජතෙ දිසො

1912. සමාගතා ජානපදා නෙගමා ච සමාගතා,
මිගාධඤ්ඤානි ඛාදන්ති තං දෙවො පටිසෙධතු.

1913. කාමං ජනපදො මාසි රට්ඨංවාපි විනස්සතු,
නත්වෙවාහං රුරුං දුබ්භෙ දත්වා අභයදක්ඛිණං.

1914. මා මෙ ජනපදො ආසි රට්ඨඤ්චපි විනස්සතු,
නත්වෙව මිග රාජස්ස වරං දත්වා මුසා භණෙති.

1915. ආසිංසෙථෙව පුරිසො න නිබ්බින්දෙය්ය පණ්ඩිතො,
පස්සාමි වොහං අත්තානං යථා ඉච්ඡිං තථා අහු.

1916. ආසිංසෙථෙව පුරිසො න නිබ්බින්දෙය්ය පණ්ඩිතො,
පස්සාමි වොහං අත්තානං උදකා ථලමුබ්භතං.

1917. වායමෙථෙව පුරිසො න නිබ්බින්දෙය්ය පණ්ඩිතො,
පස්සාමි වොහං අත්තානං යථා ඉච්ඡිං තථා අහු.