1885. අහමෙව දුබ්භාසිතං භාසි බාලො
භොකො ව අරඤ්ඤෙ අහිමව්හයානො,
තක්කාරියෙ සොබ්භමිමං පතාමි
න කිරෙව සාධු අතිවෙලභාණි.

1886. පප්පොති මච්චො අතිවෙලභාණී
බන්ධං වධං සොකපරිද්දවඤ්ච,
අත්තානං යෙව ගරහාසි එත්තො
ආචෙර යං තං නිඛණන්ති සොබ්භෙ.

1887. කිමෙවාහං තුණ්ඩිල මනුපුච්ඡිං
කරෙය්ය සං භාතරං කාළිකායං,
නග්ගොවහං වත්ථයුගඤ්ච ජීනො
අයම්පි අත්ථො බහුතාදිසොව.

1888. යො යුජ්ඣමානානං අයුජ්ඣමානො
මෙණ්ඩන්තරං අච්චුපතී කුලිඞ්ගො,
සො පිංසිතො මෙණ්ඩසිරෙහි තත්ථ
අයම්පි අත්ථො බහුතාදිසොව.

1889. චතුරො ජනා පොත්ථකං අග්ගහෙසුං
එකඤ්ච පොසං අනුරක්ඛමානා
සබ්බෙව තෙ භින්නසිරා සයිංසු
අයම්පි අත්ථො බහුතාදිසොව.

1890. අජා යථා වෙළුගුම්බස්මිං බද්ධා
අවෙක්ඛිපන්තී අසිමජ්ඣගඤ්ජි,
තෙනෙව තස්සා ගලකාවකන්තං
අයම්පි අත්ථො බහුතාදිසොව.

1891. නයිමෙ දෙවා නපි ගන්ධබ්බපුත්තා,
මිගා ඉමෙ අත්ථවසාහතා ඉමෙ
එකඤ්ච නං සායමාසෙ පචන්තු.
එකඤ්ච පුන පාතරාසෙ පචන්තු.

1892. සතං සහස්සානං දුබ්භාසිතානං
කලම්පි නාග්ඝන්ති සුභාසිතස්ස,
දුබ්භාසිතං සඞ්කමානො කිලෙසො
තස්මා තුණ්හී කිම්පුරිසො න බාල්යා.

1893. යා මෙසා ව්යාකාසි පමුඤ්චථෙතං.
ගිරිඤ්ච නං හිමවන්තං නයන්තු,
ඉමඤ්ච ඛො දෙන්තු මහානසාය
පාතොව නං පාතරාසෙ පචන්තු.

1894. පජ්ජුන්නනාථා පසවො පසුනාථා අයං පජා,
ත්වං නාථොස්මි මහාරාජ අම්භනාථා මම භරියා,
ද්වින්නමඤ්ඤතරං ඤත්වා මුතෙතා ගච්ඡෙය්ය පබ්බතං.

1895. න චෙ නින්දා සුපරිවජ්ජයෙථ
නානා ජනා සෙවිතබ්බා ජනින්ද,
යෙනෙව එකො ලභතෙ පසංසං
තෙනෙව අඤ්ඤො ලභතෙ නින්දිතාරං.

1896. සබ්බො ලොකො පරිචිත්තොන අචිත්තො
සබ්බො ලොකො විත්තවාසම්භි චිත්තෙ,
පච්චෙකචිත්තා පුථුසබ්බසත්තා
කස්සීධ චිත්තස්ස වසෙන වත්තති.

1897. තුණ්හි අහූ කිම්පුරිසො සභරියො
යොදානි ව්යාකාසි භයස්ස භීතො,
සොදානි මුත්තො සුඛිතො ආරොගො
වාචා කිරෙවත්ථවතී නරානන්ති.