1686. කාමං කාමයමානස්ස තස්ස චෙ තං සමිජ්ඣති,
අද්ධා පීතිමනො හොති ලද්ධා මච්චො යදිච්ඡති.

1687. කාමං කාමයමානස්ස තස්ස වෙ තං සමිජ්ඣති,
තතො නං අපරං කාමෙ ඝම්මෙ තණ්හංව වින්දති.

1688. ගවංව සිඞ්ගිනො සඞ්ගං වඩ්ඪමානස්ස වඩ්ඪති,
එවං මන්දස්ස පොසස්ස බාලස්ස අවිජානතො,
භිය්යො තණ්හා පිපාසා ච වඩ්ඪමානස්ස වඩ්ඪති.

1689. පථව්යා සාලියවකං ගවාස්සං දාසපොරිසං,
දත්වාපි නාලමෙකස්ස ඉති විද්වා සමඤ්චරෙ.

1690. රාජා පසය්හ පඨවිං විජෙත්වා
සසාගරන්තං මහිමාවසන්තො;
ඔරං සමුද්දස්ස අතිත්තරූපො
පාරං සමුද්දස්සපි පත්ථයෙථ.

1691. යාව අනුස්සරං කාමෙ මනසා තිත්ති නාජ්ඣගා,
තතො නිවත්තා පටික්කම්ම දිස්වා,
තෙ වෙ තිත්තා යෙ පඤ්ඤාය තිත්තා.

1692. පඤ්ඤාය තිත්තිනං සෙට්ඨං න සො කාමෙහි තප්පති,
පඤ්ඤාය තිත්තං පුරිසං තණ්හා න කුරුතෙ වසං.

1693. අපචිනෙථෙව කාමානි අප්පිච්ඡස්ස අලොලුපො,
සමුද්දමත්තො පුරිසො න සො කාමෙහි තප්පති.

1694. රථකාරොව චම්මස්ස පරීකත්තං උපාහනං,
යං යං චජති කාමානං තං තං සම්පජ්ජතෙ සුඛං,
සබ්බෙඤ්ච සුඛමිච්ඡෙය්ය සබ්බෙ කාමෙ පරිච්චජෙ.

1695. අට්ඨ තෙ භාසිතා ගාථා සබ්බා හොන්ති සහස්සියො,
පතිගණ්හ මහාබ්රහ්මෙ සාධෙතං තව භාසිතං.

1696. න මෙ අත්ථො සහස්සෙහි සතෙහි නහුතෙහි වා,
පච්ඡිමං භාසතො ගාථං කාමෙ මෙ න රතො මනො.

1697. භද්දො වතායං මාණවකො සබ්බලොකවිදූ මුනි,
යො තණ්හං දුක්ඛජනනිං පරිජානාති පණ්ඩිතොති.

1698. දස ඛලු ඉමානි ඨානානි යානි පුබ්බෙ අකාරිත්වා,
ස පච්ඡා මනුතප්පති ඉච්චාහ රාජා ජනසන්ධො.

1699. අලද්ධා චිත්තං තපති පුබ්බෙ අසමුදානිතං
න පුබ්බෙ ධනමෙසිස්සං ඉති පච්ඡානුතප්පති.

1700. සක්යරූපං පුරෙ සන්තං මයා සිප්පං න සික්ඛිතං,
කිච්ඡා වුත්ති අසිප්පස්ස ඉති පච්ඡානුතප්පති.

1701. කූටවෙදී පුරෙ ආසිං පිසුනො පිට්ඨිමංසිකො,
චණ්ඩො ච ඵරුසො චාසිං ඉති පච්ඡානුතප්පති.

1702. පාණාතිපාතී පුරෙ ආසිං ලුද්දො චාසිං අනාරියො,
භූතානං නාවදායිස්සං ඉති පච්ඡානුතප්පති.

1703. බහූසු වත සන්තීසු අනපාදාසු ඉත්ථිසු,
පරදාරං අසෙවිස්සං ඉති පච්ඡානුතප්පති.