1698. දස ඛලු ඉමානි ඨානානි යානි පුබ්බෙ අකාරිත්වා,
ස පච්ඡා මනුතප්පති ඉච්චාහ රාජා ජනසන්ධො.

1699. අලද්ධා චිත්තං තපති පුබ්බෙ අසමුදානිතං
න පුබ්බෙ ධනමෙසිස්සං ඉති පච්ඡානුතප්පති.

1700. සක්යරූපං පුරෙ සන්තං මයා සිප්පං න සික්ඛිතං,
කිච්ඡා වුත්ති අසිප්පස්ස ඉති පච්ඡානුතප්පති.

1701. කූටවෙදී පුරෙ ආසිං පිසුනො පිට්ඨිමංසිකො,
චණ්ඩො ච ඵරුසො චාසිං ඉති පච්ඡානුතප්පති.

1702. පාණාතිපාතී පුරෙ ආසිං ලුද්දො චාසිං අනාරියො,
භූතානං නාවදායිස්සං ඉති පච්ඡානුතප්පති.

1703. බහූසු වත සන්තීසු අනපාදාසු ඉත්ථිසු,
පරදාරං අසෙවිස්සං ඉති පච්ඡානුතප්පති.

1704. බහුම්හි වත සන්තම්හි අන්නපානෙ උපට්ඨිතෙ,
න පුබ්බෙ අදදිං දානං ඉති පච්ඡානුතප්පති.

1705. මාතරං පිතරං වාපි ජිණ්ණකෙ ගතයොබ්බනෙ,
පහූ සන්තො න පොසිස්සං ඉති පච්ඡානුතප්පති.

1706. ආචරියමනුසත්ථාරං සබ්බකාමරසාහරං,
පිතරං අතිමඤ්ඤිස්සං ඉති පච්ඡානුතප්පති.

1707. සමණෙ බ්රාහ්මණෙ චාපි සීලවන්තෙ බහුස්සුතෙ,
න පුබ්බෙ පයිරුපාසිස්සං ඉති පච්ඡානුතප්පති,

1708. සාධු හොති තපො චිණ්ණො සන්තො ච පයිරුපාසිතො,
න ච පුබ්බෙ තපො චිණෙණා ඉති පච්ඡානුතප්පති.

1709. යො ච එතානි ඨානානි යොනිසො පටිපජ්ජති,
කරං පුරිසකිච්චානි ස පච්ඡා නානුතප්පතී’ති.

1710. කණ්හො කණ්හො ච ඝොරො ච සුක්කදාඨො පතාපවා,
බද්ධො පඤ්චහි රජ්ජූහි කිං ධීර සුනඛො තව.

1711. කායං මිගානං අත්ථාය උසීනර භවිස්සති,
මනුස්සානං අනයො හුත්වා තදා කණ්හො පමොක්ඛති.

1712. පත්තහත්ථා සමණකා මුණ්ඩා සංඝාටිපාරුතා,
නඞ්ගලෙහි කසිස්සන්ති තදා කණ්හො පමොක්ඛති.

1713. තපස්සිනියො පබ්බජිතා මුණ්ඩා සංඝාටි පාරුතා,
යදා ලොකෙ ගමිස්සන්ති තදා කණ්හො පමොක්ඛති.

1714. දීඝුත්තරොට්ඨා ජටිලා පඞ්කදන්තා රජස්සිරා,
ඉණං වොදාය ගච්ඡන්ති තදා කණ්හො පමොක්ඛති.

1715. අධිච්ච වෙදෙ සාවිත්තිං යඤ්ඤතන්ත්රඤ්ච බ්රාහ්මණා,
භතිකාය යජිස්සන්ති තදා කණ්හො පමොක්ඛති.