1602. මිත්තාමච්චපරිබ්බූළ්හං අහං වන්දෙ රථෙසභං,
පබ්බජිස්සං මහාරාජ තං දෙවො අනුමඤ්ඤතු.

1603. සචෙ තෙ ඌනං කාමෙහි අහං පරිපූරයාමි තෙ,
යො තං හිංසති වාරෙමි මා පබ්බජි යුධඤ්ජය.

1604. න චත්ථි ඌනං කාමෙහි හිංසිතා මෙ න විජ්ජති,
දීපඤ්ච කාතුමිච්ඡාමි යං ජරා නාභිකීරති.

1605. පුත්තො වා පිතරං යාචෙ පිතා වා පුත්තමොරසං,
නෙගමො යාචතෙ තාත මා පබ්බජි යුධඤ්ජය.

1606. මා මං තාත නිවාරෙසි පබ්බජන්තං රථෙසභ,
මාහං කාමෙහි සම්මත්තො ජරාය වසමන්වගු.

1607. අහං තං තාත යාචාමි අහං පුත්ත නිවාරයෙ,
චිරන්තං දට්ඨුමිච්ඡාමි මා පබ්බජි යුධඤ්ජය.

1608. උස්සාවොව තිණග්ගම්හි සුරියස්සුග්ගමනං පති,
එවමායු මනුස්සානං මා මං අම්ම නිවාරයෙ.

1609. තරමානො ඉමං යානං ආරොපෙතු රථෙසභ,
මා මෙ මාතා තරන්තස්ස අන්තරායකරා අහු.

1610. අභිධාවථ භද්දන්තෙ සුඤ්ඤං හෙස්සති රම්මකං,
යුධඤ්ජයො අනුඤ්ඤාතො සබ්බදත්තෙන රාජිනා.

1611. යොහු සෙට්ඨො සහස්සස්ස යුවා කඤ්චනසන්නිභො,
සොයං කුමාරො පබ්බජිතො කාසායවසනො බලී.

1612. උභො කුමාරා පබ්බජිතා යුධඤ්ජයො යුධිට්ඨිලො,
පහාය මාතාපිතරො සඞ්කං ඡෙත්වාන මච්චුනො’ති.

1613. එථ ලක්ඛණ සීතා ච උභො ඔතරථොදකං,
එවායං භරතො ආහ රාජා දසරථො මතො.

1614. කෙන රාමප්පභාවෙන සොචිතබ්බං න සොචසි,
පිතරං කාලකතං සුත්වා න තං පසහතෙ දුඛං.

1615. යං න සක්කා පාලෙතුං පොසෙන ලපතා බහු,
ස කිස්ස විඤ්ඤූ මෙධාවී අන්තානමුපතාපයෙ.

1616. දහරා ච හි යෙ වුද්ධා යෙ බාලා යෙ ච පණ්ඩිතා,
අඩ්ඪා චෙව දළිද්දා ච සබ්බෙ මච්චුපරායණා.

1617. ඵලානමිව පක්කානං නිච්චං පපතනා භයං,
එවං ජාතාන මච්චානං නිච්චං මරණතො භයං.

1618. සායමෙකෙ න දිස්සන්ති පාතො දිට්ඨා බහුජ්ජනා,
පාතො එකෙ න දිස්සන්ති සායං දිට්ඨා බහුජ්ජනා

1619. පරිදෙවයමානො චෙ කඤ්චිදත්ථං උදබ්බහෙ,
සම්මූළ්හො හිංසමත්තානං කයිරා චෙතං විචක්ඛණො.

1620. කිසො විවණ්ණො භවති හිංසමත්තානමත්තනා,
න තෙන පෙතා පාලෙන්ති නිරත්ථා පරිදෙවනා.