1613. එථ ලක්ඛණ සීතා ච උභො ඔතරථොදකං,
එවායං භරතො ආහ රාජා දසරථො මතො.

1614. කෙන රාමප්පභාවෙන සොචිතබ්බං න සොචසි,
පිතරං කාලකතං සුත්වා න තං පසහතෙ දුඛං.

1615. යං න සක්කා පාලෙතුං පොසෙන ලපතා බහු,
ස කිස්ස විඤ්ඤූ මෙධාවී අන්තානමුපතාපයෙ.

1616. දහරා ච හි යෙ වුද්ධා යෙ බාලා යෙ ච පණ්ඩිතා,
අඩ්ඪා චෙව දළිද්දා ච සබ්බෙ මච්චුපරායණා.

1617. ඵලානමිව පක්කානං නිච්චං පපතනා භයං,
එවං ජාතාන මච්චානං නිච්චං මරණතො භයං.

1618. සායමෙකෙ න දිස්සන්ති පාතො දිට්ඨා බහුජ්ජනා,
පාතො එකෙ න දිස්සන්ති සායං දිට්ඨා බහුජ්ජනා

1619. පරිදෙවයමානො චෙ කඤ්චිදත්ථං උදබ්බහෙ,
සම්මූළ්හො හිංසමත්තානං කයිරා චෙතං විචක්ඛණො.

1620. කිසො විවණ්ණො භවති හිංසමත්තානමත්තනා,
න තෙන පෙතා පාලෙන්ති නිරත්ථා පරිදෙවනා.

1621. යථාසරණමාදිත්තං වාරිනා පරිනිබ්බයෙ,
එවම්පි ධීරො සුතවා මෙධාවී පණ්ඩිතො නරො
ඛිප්පමුප්පතිතං සොකං වාතො තූලංව ධංසයෙ.

1622. එකොව මච්චො අච්චෙති එකොව ජායතෙ කුලෙ,
සඤ්ඤොගපරමාත්වෙව සම්භොගා සබ්බපාණිනං.

1623. තස්මා හි ධීරස්ස බහුස්සුතස්ස
සම්පස්සසතො ලොකමිමං පරඤ්ච,
අඤ්ඤාය ධම්මං හදයං මනඤ්ච
සොකා මහන්තාපි න තාපයන්ති.

1624. සොහං දස්සඤ්ච භොක්ඛඤ්ච භරිස්සාමි ච ඤාතකෙ,
සෙසං සම්පාලයිස්සාමි කිච්චමෙතං විජානතො.

1625. දස වස්සසහස්සානි සට්ඨිවස්සසතානි ච,
කම්බුගීවො මහාබාහු රාමො රජ්ජමකාරයීති

1626. ජානන්තො නො මහාරාජ තව සීලං ජනාධිපො,
ඉමෙ කුමාරෙ පූජෙන්තො න තං කෙනචි මඤ්ඤථ.

1627. තිට්ඨන්තෙ නො මහාරාජෙ ආදු දෙවෙ දිවංගතෙ,
ඤාතී නං සමනුමඤ්ඤිංසු සම්පස්සං අත්ථමත්තනො.

1628. කෙන සංවරවත්තෙන සඤ්ජාතෙ අධිතිට්ඨසි,
කෙන තං නාතිවත්තන්ති ඤාතිසඞ්ඝා සමාගතා.

1629. න රාජපුත්ත උසුය්යාමි සමණානං මහෙසිනං,
සක්කච්චං තෙ නමස්සාමි පාදෙ වන්දාමි තාදිනං.

1630. තෙ මං ධම්මගුණෙ යුත්තං සුස්සූසමනුසුය්යකං,
සමණා සමනුසාසන්ති. ඉසී ධම්මගුණෙ රතා.

1631. තෙසාහං වචනං සුත්වා සමණානං මහෙසිනං,
න කිඤ්චි අතිමඤ්ඤාමි ධම්මෙ මෙ නිරතො මනො.

1632. හත්ථාරුහා අනීකට්ඨා රථිකා පත්තිකාරිකා,
තෙසං නප්පටිබන්ධාමි නිබද්ධං භත්තවෙතනං.