4943. පදුමුත්තරො නාම ජිනො සබ්බධම්මාන පාරගු,
විවෙකකාමො සම්බුද්ධො ගච්ඡතෙ අනිලඤ්ජසෙ.

4944. අවිදූරෙ හිමවතො මහාජාතස්සරො අහු,
තත්ථ මෙ භවනං ආසි පුඤ්ඤකම්මෙන සංයුතං.

4945. භවනා අභිනික්ඛම්ම අද්දසං ලොකනායකං,
ඉන්දීවරංව ජලිතං ආදිත්තංව හුතාසනං.

4946. විචිනං නාද්දසං පුප්ඵං පූජයිස්සන්ති නායකං,
සකං චිත්තං පසාදෙත්වා අවන්දිං සත්ථුනො අහං.

4947. මම සීසෙ මණිං ගය්හ පූජයිං ලොකනායකං,
ඉමාය මණිපූජාය විපාකො හොතු භද්දකො.

4948. පදුමුත්තරො ලොකවිදූ ආහුතීනං පටිග්ගහො,
අන්තළික්ඛෙ ඨිතො සත්ථා ඉමං ගාථං අභාසථ.

4949. සො තෙ ඉජ්ඣතු සඞ්කප්පො ලභස්සු විපුලං සුඛං,
ඉමාය මණිපූජාය අනුභොහි මහායසං.

4950. ඉදං වත්වාන භගවා ජලජුත්තමනාමකො,
අගමාසි බුද්ධසෙට්ඨො යත්ථ චිත්තං පණීහිතං.

4951. සට්ඨිකප්පානි දෙවින්දො දෙවරජ්ජමකාරයිං,
අනෙකසතක්ඛත්තුඤ්ච චක්කවත්තී අහොසහං.

4952. පුබ්බකම්මං සරන්තස්ස දෙවභූතස්ස මෙ සතො,
මණි නිබ්බත්තතෙ මය්හං ආලොකකරණො මමං.

4953. ඡළාසීතිසහස්සානි නාරියො මෙ පරිග්ගහා,
විචිත්තවත්ථාභරණා ආමුත්තමණිකුණ්ඩලා

4954. අළාරපම්හා හසුලා සුත්ථනා තනුමජ්ඣිමා,
පරිවාරෙන්ති මං නිච්චං මණිපූජායිදං ඵලං.

4955. සොණ්ණමයා මණිමයා ලොහිතඞ්කමයා තථා,
භණ්ඩා මෙ සුකතා හොන්ති යදිච්ඡාය පිළන්ධනා.

4956. කූටාගාරා ගුහා රම්මා සයනඤ්ච මහාරහං,
මම සඞ්කප්පමඤ්ඤාය නිබ්බත්තන්ති යදිච්ඡකං.

4957. ලාභා තෙසං සුලද්ධං ච යෙ ලභන්ති උපස්සුතිං,
පුඤ්ඤක්ඛෙත්තං මනුස්සානං ඔසධං සබ්බපාණිනං.

4958. මය්හම්පි සුකතං කම්මං යොහං අද්දක්ඛි නායකං,
විනිපාතා පමුත්තොම්හි පත්තොම්හි අචලං පදං.

4959. යං යං යොනුපපජ්ජාමි දෙවත්තං අථ මානුසං,
සමන්තා සත්තරතනා ආලොකො හොති මෙ සදා.

4960. තායෙව මණිපූජාය අනුභොත්වාන සම්පදා,
ඤාණාලොකො මයා දිට්ඨො පත්තොම්හි අචලං පදං.

4961. සතසහස්සෙ ඉතො කප්පෙ යං මණිං අභිපූජයිං,
දුග්ගතිං නාභිජානාමි මණිපූජයිදං ඵලං.

4962. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4963. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4964. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4965. කොසිකො නාම භගවා චිත්තකූටෙ වසී තදා,
ඣායී ඣානරතො බුද්ධො විවෙකාභිරතො මුනි.

4966. අජ්ඣොගහෙත්වා හිමවන්තං නාරීගණපුරක්ඛතො,
අද්දසං කොසිකං බුද්ධං පුණ්ණමාසෙව චන්දිමං.