4965. කොසිකො නාම භගවා චිත්තකූටෙ වසී තදා,
ඣායී ඣානරතො බුද්ධො විවෙකාභිරතො මුනි.

4966. අජ්ඣොගහෙත්වා හිමවන්තං නාරීගණපුරක්ඛතො,
අද්දසං කොසිකං බුද්ධං පුණ්ණමාසෙව චන්දිමං.

4967. උක්කාසතෙ ගහෙත්වාන පරිවාරෙසහං තදා,
සත්තරත්තින්දිවං ඨත්වා අට්ඨමෙන අගච්ඡහං.

4968. වුට්ඨිතං කොසිකං බුද්ධං සයම්භුං අපරාජිතං,
පසන්නචිත්තො වන්දිත්වා එකං භික්ඛං අදාසහං.

4969. තෙන කම්මෙන දිපදින්ද ලොකජෙට්ඨ නරාසභ,
උප්පජ්ජිං තුසිතෙ කායෙ එකභික්ඛායිදං ඵලං.

4970. දිවසඤ්චෙව රත්තිඤ්ච ආලොකො හොති මෙ සදා,
සමන්තා යොජනසතං ඔභාසෙන ඵරාමහං.

4971. පඤ්චපඤ්ඤාසකප්පම්හි චක්කවත්තී අහොසහං,
චාතුරන්තො විජිතාවී ජම්බුසණ්ඩස්ස ඉස්සරො,

4972. තදා මෙ නගරං ආසි ඉද්ධං ඵීතං සුනිම්මිතං,
තිංසයොජනමායාමං විත්ථාරෙන ච වීසති.

4973. සොභනං නාම නගරං විස්සකම්මෙන මාපිතං,
දසසද්දාවිචිත්තන්තං සම්මතාළසමාහිත.

4974. න තස්මිං නගරෙ අත්ථි වල්ලි කට්ඨං ච මත්තිකා,
සබ්බසොණ්ණමයං යෙව ජොතතෙ නිච්චකාලිකං.

4975. චතුපාකාරපරික්ඛිත්තං තයො ආසුං මණිමයා,
වෙමජ්ඣෙ තාලපන්තී ච විස්සකම්මෙන මාපිතා,

4976. දසසහස්සා පොක්ඛරඤ්ඤො පදුමුප්පලඡාදිතා,
පුණ්ඩරීකෙහි සඤ්ඡන්නා නානාගන්ධසමෙරිතා.

4977. චතුනවුතෙ ඉතො කප්පෙ යං උක්කං ධාරයිං අහං,
දුග්ගතිං නාභිජානාමි උක්කාධාරස්සිදං ඵලං.

4978. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4979. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.