4936. සුවණ්ණවණ්ණං සම්බුද්ධං ආහුතීනං පටිග්ගහං,
පවනග්ගෙන ගච්ඡන්තං අද්දසං ලොකනායකං.

4937. නළමාලං ගහෙත්වාන නික්ඛමන්තොව තාවදෙ,
තත්ථද්දසාසිං සම්බුද්ධං ඔඝතිණ්ණමනාසවං.

4938. පසන්නචිත්තො සුමනො නළමාලං අපූජයිං,
දක්ඛිණෙය්යං මහාවීරං සබ්බලොකානුකම්පකං.

4939. එකතිංසෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

4940. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4941. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4942. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4943. පදුමුත්තරො නාම ජිනො සබ්බධම්මාන පාරගු,
විවෙකකාමො සම්බුද්ධො ගච්ඡතෙ අනිලඤ්ජසෙ.

4944. අවිදූරෙ හිමවතො මහාජාතස්සරො අහු,
තත්ථ මෙ භවනං ආසි පුඤ්ඤකම්මෙන සංයුතං.

4945. භවනා අභිනික්ඛම්ම අද්දසං ලොකනායකං,
ඉන්දීවරංව ජලිතං ආදිත්තංව හුතාසනං.

4946. විචිනං නාද්දසං පුප්ඵං පූජයිස්සන්ති නායකං,
සකං චිත්තං පසාදෙත්වා අවන්දිං සත්ථුනො අහං.

4947. මම සීසෙ මණිං ගය්හ පූජයිං ලොකනායකං,
ඉමාය මණිපූජාය විපාකො හොතු භද්දකො.

4948. පදුමුත්තරො ලොකවිදූ ආහුතීනං පටිග්ගහො,
අන්තළික්ඛෙ ඨිතො සත්ථා ඉමං ගාථං අභාසථ.

4949. සො තෙ ඉජ්ඣතු සඞ්කප්පො ලභස්සු විපුලං සුඛං,
ඉමාය මණිපූජාය අනුභොහි මහායසං.

4950. ඉදං වත්වාන භගවා ජලජුත්තමනාමකො,
අගමාසි බුද්ධසෙට්ඨො යත්ථ චිත්තං පණීහිතං.

4951. සට්ඨිකප්පානි දෙවින්දො දෙවරජ්ජමකාරයිං,
අනෙකසතක්ඛත්තුඤ්ච චක්කවත්තී අහොසහං.

4952. පුබ්බකම්මං සරන්තස්ස දෙවභූතස්ස මෙ සතො,
මණි නිබ්බත්තතෙ මය්හං ආලොකකරණො මමං.

4953. ඡළාසීතිසහස්සානි නාරියො මෙ පරිග්ගහා,
විචිත්තවත්ථාභරණා ආමුත්තමණිකුණ්ඩලා

4954. අළාරපම්හා හසුලා සුත්ථනා තනුමජ්ඣිමා,
පරිවාරෙන්ති මං නිච්චං මණිපූජායිදං ඵලං.