3206. උපසන්තො ච සම්බුද්ධො වසතී පබ්බතන්තරෙ,
එකං චම්පකමාදාය උපගච්ඡිං නරුත්තමං.

3207. පසන්නචිත්තො සුමනො පච්චෙකමුනිමුත්තමං,
උභොහත්ථෙහි පග්ගය්හ පූජයිං අපරාජිතං.

3208. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

3209. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3210. චන්දභාගානදීතීරෙ අනුසොතං වජාමහං,
අද්දසං විරජං බුද්ධං සාලරාජංව ඵුල්ලිතං.

3211. පසන්නචිත්තො සුමනො පච්චෙකමුනිමුත්තමං,
ගහෙත්වා තිමිරං පුප්ඵං මත්ථකෙ ඔකිරිං අහං.

3212. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

3213. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3214. චන්දභාගානදීතීරෙ අහොසිං කින්නරො තදා,
තත්ථද්දසං දෙවදෙවං චඞ්කමන්තං නරාසභං.

3215. ඔචිනිත්වාන සලලං පුප්ඵං බුද්ධස්ස’දාසහං,
උපසිඞ්ඝි මහාවීරො සලලං දෙවගන්ධිකං.

3216. පටිග්ගහෙත්වා සම්බුද්ධො විපස්සී ලොකනායකො,
උපසිඞ්ඝි මහාවීරො පෙක්ඛමානස්ස මෙ සතො.

3217. පසන්නචිත්තො සුමනො වන්දිත්වා දිපදුත්තමං,
අඤ්ජලිම්පග්ගහෙත්වාන පුන පබ්බතමාරුහිං.

3218. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

3219. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

මන්දාරවඤ්ච කක්කාරු භිස කෙසරපුප්ඵියො
අඞ්කොලකො කදමබී ච උද්දාල එකචම්පකො
තිමිරං සලලඤ්චෙව ගාථා තාළීස එව ච.