369. තිමිරපුප්ඵියත්ථෙරාපදානං.
3210. චන්දභාගානදීතීරෙ අනුසොතං වජාමහං,
අද්දසං විරජං බුද්ධං සාලරාජංව ඵුල්ලිතං.
අද්දසං විරජං බුද්ධං සාලරාජංව ඵුල්ලිතං.
3211. පසන්නචිත්තො සුමනො පච්චෙකමුනිමුත්තමං,
ගහෙත්වා තිමිරං පුප්ඵං මත්ථකෙ ඔකිරිං අහං.
ගහෙත්වා තිමිරං පුප්ඵං මත්ථකෙ ඔකිරිං අහං.
3212. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.
දුග්ගතිං නාභිජානාමි බුද්ධපූජායිදං ඵලං.
3213. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.
ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිමිරපුප්ඵියො ථෙරො ඉමා ගාථායො අභාසිත්ථාති.
තිමිරපුප්ඵියත්ථෙරස්ස අපදානං නවමං.
370. සලලපුප්ඵියත්ථෙරාපදානං.
3214. චන්දභාගානදීතීරෙ අහොසිං කින්නරො තදා,
තත්ථද්දසං දෙවදෙවං චඞ්කමන්තං නරාසභං.
තත්ථද්දසං දෙවදෙවං චඞ්කමන්තං නරාසභං.
3215. ඔචිනිත්වාන සලලං පුප්ඵං බුද්ධස්ස’දාසහං,
උපසිඞ්ඝි මහාවීරො සලලං දෙවගන්ධිකං.
උපසිඞ්ඝි මහාවීරො සලලං දෙවගන්ධිකං.
3216. පටිග්ගහෙත්වා සම්බුද්ධො විපස්සී ලොකනායකො,
උපසිඞ්ඝි මහාවීරො පෙක්ඛමානස්ස මෙ සතො.
උපසිඞ්ඝි මහාවීරො පෙක්ඛමානස්ස මෙ සතො.
3217. පසන්නචිත්තො සුමනො වන්දිත්වා දිපදුත්තමං,
අඤ්ජලිම්පග්ගහෙත්වාන පුන පබ්බතමාරුහිං.
අඤ්ජලිම්පග්ගහෙත්වාන පුන පබ්බතමාරුහිං.
3218. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.
දුග්ගතිං නාභිජානාමි බුද්ධපූජායිදං ඵලං.
3219. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.
ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සලලපුප්ඵියො ථෙරො ඉමා ගාථායො අභාසිත්ථාති.
සලලපුප්ඵියත්ථෙරස්ස අපදානං දසමං.
උද්දානං:
මන්දාරවඤ්ච කක්කාරු භිස කෙසරපුප්ඵියො
අඞ්කොලකො කදමබී ච උද්දාල එකචම්පකො
තිමිරං සලලඤ්චෙව ගාථා තාළීස එව ච.
අඞ්කොලකො කදමබී ච උද්දාල එකචම්පකො
තිමිරං සලලඤ්චෙව ගාථා තාළීස එව ච.
මන්දාරවපුප්ඵියවග්ගො සත්තතිංසතිමො.
38. බොධිවන්දකවග්ගො
371. බොධිවන්දකත්ථෙරාපදානං
3220. පාටලිං හරිතං දිස්වා පාදපං ධරණීරුහං,
එකංසං අඤ්ජලිං කත්වා අවන්දිං පාටලිං අහං.
එකංසං අඤ්ජලිං කත්වා අවන්දිං පාටලිං අහං.
3221. අඤ්ජලිං පග්ගහෙත්වාන ගරුං කත්වාන මානසං,
අන්තොසුද්ධං බහිසුද්ධං සුවිමුත්තමනාසවං.
අන්තොසුද්ධං බහිසුද්ධං සුවිමුත්තමනාසවං.
3222. විපස්සිං ලොකමහිතං කරුණාඤාණසාගරං,
සම්මුඛා විය සම්බුද්ධං අවන්දිං පාටලිං අහං.
සම්මුඛා විය සම්බුද්ධං අවන්දිං පාටලිං අහං.
3223. එකනවුතෙ ඉතො කප්පෙ යං බොධිමභිවන්ද’හං,
දුග්ගතිං නාභිජානාමි වන්දනාය ඉදං ඵලං.
දුග්ගතිං නාභිජානාමි වන්දනාය ඉදං ඵලං.
3224. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.
ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බොධිවන්දකො ථෙරො ඉමා ගාථායො අභාසිත්ථාති.
බොධිවන්දකත්ථෙරස්ස අපදානං පඨමං.
372. පාටලිපුප්ඵියත්ථෙරාපදානං.
3225. විපස්සී නාම භගවා සයම්භූ අග්ගපුග්ගලො,
පුරක්ඛතො සසිස්සෙහි බන්ධුමං පාවිසි ජිනො.
පුරක්ඛතො සසිස්සෙහි බන්ධුමං පාවිසි ජිනො.
3226. තීණි පාටලිපුප්ඵානි උච්ඡඞ්ගෙ ඨපිතානි මෙ,
සීසං නහාතුකාමොව නදීතිත්ථං අගච්ඡ’හං.
සීසං නහාතුකාමොව නදීතිත්ථං අගච්ඡ’හං.
3227. නික්ඛම්ම බන්ධුමතියා අද්දසං ලොකනායකං,
ඉන්දීවරංව ජලිතං ආදිත්තංව හුතාසනං.
ඉන්දීවරංව ජලිතං ආදිත්තංව හුතාසනං.
3228. ව්යග්ඝූසභංව පවරං අභිජාතංව කෙසරිං,
ගච්ඡන්තං සමණාන’ග්ගං භික්ඛුසඞ්ඝපුරක්ඛතං.
ගච්ඡන්තං සමණාන’ග්ගං භික්ඛුසඞ්ඝපුරක්ඛතං.
3229. තස්මිං පසන්නො සුගතෙ කිලෙසමලධොවනෙ,
ගහෙත්වා තීණි පුප්ඵානි බුද්ධසෙට්ඨමපූජයිං.
ගහෙත්වා තීණි පුප්ඵානි බුද්ධසෙට්ඨමපූජයිං.
3230. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.
දුග්ගතිං නාභිජානාමි බුද්ධපූජායිදං ඵලං.
3231. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.
ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පාටලිපුප්ඵියො ථෙරො ඉමා ගාථායො අභාසිත්ථාති.
පාටලිපුප්ඵියත්ථෙරස්ස අපදානං දුතියං.