983. චන්දභාගානදීතීරෙ සුංසුමාරො අහං තදා,
සගොචරප්පසුතො’හං නදීතිත්ථං අගඤ්ඡ’හං.

984. සිද්ධත්ථො තම්හි සමයෙ සයම්භූ අග්ගපුග්ගලො,
නදිං තරිතුකාමො සො නදීතිත්ථං උපාගමි.

985. උපාගතෙ ච සම්බුද්ධෙ අහම්පි තත්ථු’පාගමිං,
උපගන්ත්වාන සම්බුද්ධං ඉමං වාචං උදීරයිං.

986. අභිරූහ මහාවීර තාරෙස්සාමි අහං තුවං,
පෙත්තිකං විසයං මය්හං අනුකම්ප මහාමුනෙ.

987. මම උග්ගජ්ජනං සුත්වා අභිරූහි මහාමුනි,
හට්ඨො හට්ඨෙන චිත්තෙන තාරෙසිං ලොකනායකං.

988. නදියා පාරිමෙ තීරෙ සිද්ධත්ථො ලොකනායකො,
අස්සාසෙසි මමං තත්ථ අමතං පාපුණිස්සසි.

989. තම්හා කායා චවිත්වාන දෙවලොකං අගච්ඡහං,
දිබ්බං සුඛං අනුභවිං අච්ඡරාභි පුරක්ඛතො.

990. සත්තක්ඛත්තුඤ්ච දෙවින්දො දෙවරජ්ජං අකාස’හං,
තීණික්ඛත්තුං චක්කවත්තී මහියා ඉස්සරො අහුං.

991. විවෙකමනුයුත්තො’හං නිපකො ච සුසංවුතො,
ධාරෙමි අන්තිමං දෙහං සම්මාසම්බුද්ධසාසනෙ.

992. චතුනවුතෙ ඉතො කප්පෙ තාරෙසිං යං නරාසභං,
දුග්ගතිං නාභිජානාමි තාරණාය ඉදං ඵලං.

993. පටිසම්භිදා -පෙ- බුද්ධස්ස සාසනං.

994. සුවණ්ණවණ්ණං සම්බුද්ධං ගච්ඡන්තං අන්තරාපණෙ,
විපස්සිං සත්ථවාහග්ගං නරවීරං විනායකං.

995. අදන්තදමකං තාදිං මහාවාදිං මහාමතිං,
දිස්වා පසන්නො සුමනො එකඤ්ජලිමකාස’හං.

996. එකනවුතෙ ඉතො කප්පෙ යමඤ්ජලිං කරිං තදා,
දුග්ගතිං නාභිජානාමි අඤ්ජලිස්ස ඉදං ඵලං.

997. පටිසම්භිදා -පෙ- බුද්ධස්ස සාසනං.

998. නගරෙ බන්ධුමතියා අහොසිං වාණිජො තදා,
තෙනෙ’ව දාරං පොසෙමි රොපෙමි බීජසම්පදං.

999. රථියං පටිපන්නස්ස විපස්සිස්ස මහෙසිනො,
එකං ඛොමං මයා දින්නං කුසලත්ථාය සත්ථුනො.