813. හිමවන්තස්ස අවිදූරෙ නිසභො නාම පබ්බතො,
අස්සමො සුකතො මය්හං පණ්ණසාලා සුමාපිතා.

814. කොසියො නාම නාමෙන ජටිලො උග්ගතාපනො,
එකාකියො අදුතියො වසාමි නිසභෙ තදා.

815. ඵලං මූලඤ්ච පණ්ණඤ්ච න භුඤ්ජාමි අහං තදා,
පවත්තපණ්ඩුපත්තානි උපජීවාමි තාවදෙ.

816. නා’හං කොපෙමි ආජීවං චජමානොපි ජීවිතං,
ආරාධෙමි සකං චිත්තං විවජ්ජෙමි අනෙසනං.

817. රාගූපසංහිතං චිත්තං යදා උප්පජ්ජතෙ මම,
සයංව පච්චවෙක්ඛාමි එකග්ගො තං දම්මෙ’හං.

818. “රජ්ජසි රජනීයෙ ච දොසනීයෙ ච දුස්සසි,
මුය්හසෙ මොහනීයෙ ච නික්ඛමස්සු වනා තුවං.

819. විසුද්ධානං අයං වාසො නිම්මලානං තපස්සිනං,
මා ඛො විසුද්ධං දූසෙසි නික්ඛමස්සු වනා තුවං.

820. අගාරිකො භවිත්වාන සදා යුත්තං ලභිස්සසි,
උභොපි මා විරාධෙසි නික්ඛමස්සු වනා තුවං.

821. ඡවාලාතං යථා කට්ඨං න ක්වචි කිච්චකාරකං,
නෙව ගාමෙ අරඤ්ඤෙ වා න හි තං කට්ඨසම්මතං.

822. ඡවාලාතූපමො ත්වංසි න ගිහී නාපි සඤ්ඤතො,
උභතො මුත්තකො අජ්ජ නික්ඛමස්සු වනා තුවං.

823. සියා නු ඛො තව එතං කො පජානාති තෙ ඉදං,
සද්ධාධුරං ජහසි තෙ කොසජ්ජබහුලාය ච.

824. ජිගුච්ඡිස්සන්ති තං විඤ්ඤූ අසුචිං නාගරිකො යථා,
ආකඩ්ඪිත්වාන ඉසයො චොදයිස්සන්ති තං සදා.

825. තං විඤ්ඤූ පවදිස්සන්ති සමතික්කන්තසාසනං,
සංවාසං අලභන්තො හි කථං ජීවිස්සසී තුවං.

826. තිධා පභින්නමාතඞ්ගං කුඤ්ජරං සට්ඨිහායනං,
බලී නාගො උපගන්ත්වා යූථා නීහරතෙ ගජං.

827. යූථා විනිස්සටො සන්තො සුඛං සාතං න වින්දති,
දුක්ඛිතො විමනො හොති පජ්ඣායන්තො පවධෙති.

828. තථෙව ජටිලා තම්පි නීහරිස්සන්ති දුම්මතිං,
තෙහි ත්වං නිස්සටො සන්තො සුඛං සාතං න ලච්ඡසි.

829. දිවා යා යදි වා රත්තිං සොකසල්ලසමප්පිතො,
ඩය්හසි පරිළාහෙන ගජො යුථා’ව නිස්සටො.

830. ජාතරූපං යථා කූටං නෙව ඣාපෙති කත්ථචි,
තථා සීලවිහීනො ත්වං න ඣාපෙස්සසි කත්ථචි.

831. අගාරං වසමානොපි කථං ජීවිහිසී තුවං,
මත්තිකං පෙත්තිකං චාපි නත්ථි තෙ නිහිතං ධනං.

832. සයං කම්මං කරිත්වාන ගත්තෙ සෙදං පමොචයං,
එවං ජීවිහිසි ගෙහෙ සාධු තෙ තං න රුච්චතී.”

833. එවාහං තත්ථ වාරෙමි සඞ්කිලෙසගතං මනං,
නානාධම්මකථං කත්වා පාපා චිත්තා නිවාරයිං.

834. එවං මෙ විහරන්තස්ස අප්පමාදවිහාරිනො,
තිංස වස්සසහස්සානි විපිනෙ මෙ අතික්කමුං.

835. අප්පමාදරතං දිස්වා උත්තමත්ථගවෙසකං,
පදුමුත්තරසම්බුද්ධො ආගච්ඡි මම සන්තිකං.

836. තිම්බරූසකවණ්ණාභො අප්පමෙය්යො අනූපමො,
රූපෙන’සදිසො බුද්ධො ආකාසෙ චඞ්කමී තදා.

837. සුඵුල්ලො සාලරාජා’ව විජ්ජූ’ව’බ්භඝනන්තරෙ,
ඤාණෙනා’සදිසො බුද්ධො ආකාසෙ චඞ්කමී තදා.

838. සීහරාජාව’සම්භීතො ගජරාජාව දප්පිතො,
ලසිතො ව්යග්ඝරාජාව ආකාසෙ චඞ්කමී තදා.

839. සිංගීනික්ඛසුවණ්ණාභො ඛදිරඞ්ගාරසන්නිභො,
මණි යථා ජොතිරසො ආකාසෙ චඞ්කමී තදා.

840. විසුද්ධකෙලාසනිභො පුණ්ණමායෙව චන්දිමා,
මජ්ඣන්තිකෙව සුරියො ආකාසෙ චඞ්කමී තදා.