994. සුවණ්ණවණ්ණං සම්බුද්ධං ගච්ඡන්තං අන්තරාපණෙ,
විපස්සිං සත්ථවාහග්ගං නරවීරං විනායකං.

995. අදන්තදමකං තාදිං මහාවාදිං මහාමතිං,
දිස්වා පසන්නො සුමනො එකඤ්ජලිමකාස’හං.

996. එකනවුතෙ ඉතො කප්පෙ යමඤ්ජලිං කරිං තදා,
දුග්ගතිං නාභිජානාමි අඤ්ජලිස්ස ඉදං ඵලං.

997. පටිසම්භිදා -පෙ- බුද්ධස්ස සාසනං.

998. නගරෙ බන්ධුමතියා අහොසිං වාණිජො තදා,
තෙනෙ’ව දාරං පොසෙමි රොපෙමි බීජසම්පදං.

999. රථියං පටිපන්නස්ස විපස්සිස්ස මහෙසිනො,
එකං ඛොමං මයා දින්නං කුසලත්ථාය සත්ථුනො.

1000. එකනවුතෙ ඉතො කප්පෙ යං ඛොමං අදදිං තදා,
දුග්ගතිං නාභිජානාමි, ඛොමදානස්සි’දං ඵලං.

1001. සත්තවීසෙ ඉතො කප්පෙ එකො සින්ධවසන්දනො,
සත්තරතනසම්පන්නො චතුදීපම්හි ඉස්සරො.

1002. පටිසම්භිදා -පෙ- බුද්ධස්ස සාසනං.

සුභූති උපවානො ච සරණො සීලගාහකො,
අන්නසංසාවකො ධූපො පුලිනො උත්තරියෙන ච.
අඤ්ජලී ඛොමදායී ච දසෙව තතියෙ ගණෙ,
පඤ්චාසීති සතං වුත්තා ගාථායො සබ්බපිණ්ඩිතා.

1003. සත්තාහං පටිසල්ලීනං සයම්භුං අග්ගපුග්ගලං,
පසන්නචිත්තො සුමනො බුද්ධසෙට්ඨං උපට්ඨහිං.

1004. වුට්ඨිතං කාලමඤ්ඤාය පදුමුත්තරං මහාමුනිං,
මහන්තිං කදලීකණ්ණිං ගහෙත්වා උපගඤ්ඡ’හං.

1005. පටිග්ගහෙත්වා භගවා තං ඵලං ලොකනායකො,
මම චිත්තං පසාදෙන්තො පරිභුඤ්ජි මහාමුනි.

1006. පරිභුඤ්ජිත්වාන සම්බුද්ධො සත්ථවාහො අනුත්තරො,
සකාසනෙ නිසීදිත්වා ඉමා ගාථා අභාසථ.

1007. “යෙ වසන්ති සමෙතාරො යක්ඛා ඉමම්හි පබ්බතෙ,
අරඤ්ඤෙ භූතභව්යානි සුණන්තු වචනං මම.

1008. යො සො බුද්ධං උපට්ඨාසි මිගරාජා ච කෙසරී
තමහං කිත්තයිස්සාමි සුණාථ මම භාසතො.