865. පදුමුත්තරො නාම ජිනො සබ්බධම්මාන පාරගූ,
ජලිත්වා අග්ගික්ඛන්ධො ව සම්බුද්ධො පරිනිබ්බුතො.

866. මහාජනා සමාගම්ම පූජයිත්වා තථාගතං,
චිතං කත්වාන සුකතං සරීරං අභිරොපයුං.

867. සරීරකිච්චං කත්වාන ධාතුං තත්ථ සමානයුං,
සදෙවමානුසා සබ්බෙ බුද්ධථූපං අකංසු තෙ.

868. පඨමා කඤ්චනමයා දුතියා’සි මණිමයා,
තතියා රූපියමයා චතුත්ථා ඵළිකාමයා.

869. තථා පඤ්චමියා නෙමී ලොහිතඞ්කමයා අහු,
ඡට්ඨා මසාරගල්ලස්ස සබ්බරතනමයූපරි.

870. ජඞ්ඝා මණිමයා ආසි වෙදිකා රතනාමයා,
සබ්බසොවණ්ණයො ථූපො උද්ධං යොජනමුග්ගතො.

871. දෙවා තත්ථ සමාගන්ත්වා එකතො මන්තයුං තදා,
“මයම්පි ථූපං කස්සාම ලොකනාථස්ස තාදිනො.

872. ධාතු ආවෙණිකා නත්ථි සරීරං එකපිණ්ඩිතං,
ඉමම්හි බුද්ධථූපම්හි කස්සාම කඤ්චුකං මයං.”

873. දෙවා සත්තරතනෙහි අඤ්ඤං වඩ්ඪෙසු යොජනං,
ථූපො ද්වියොජනුබ්බෙධො තිමිරං ව්යපහන්ති සො.

874. නාගා තත්ථ සමාගන්ත්වා එකතො මන්තයුං තදා,
“මනුස්සා චෙව දෙවා ච බුද්ධථූපං අකංසු තෙ.

875. මා නො පමත්තා අස්සුම්හා අප්පමත්තා සදෙවකා,
මයම්පි ථූපං කස්සාම ලොකනාථස්ස තාදිනො.”

876. ඉන්දනීලං මහානීලං අථො ජොතිරසං මණිං,
එකතො සන්නිපාතෙත්වා බුද්ධථූපං අඡාදයුං.

877. සබ්බං මණිමයං ආසි තාවතා බුද්ධචෙතියං,
තිංසයොජනමුබ්බෙධං ආලොකකරණං තදා.

878. ගරුළා ච සමාගන්ත්වා එකතො මන්තයුං තදා,
“මානුසා දෙවා නාගා ච බුද්ධථූපං අකංසු තෙ.

879. මා නො පමත්තා අස්සුම්හා අප්පමත්තා සදෙවකා,
මයම්පි ථූපං කස්සාම ලොකනාථස්ස තාදිනො.

880. සබ්බමණිමයං ථූපෙ අකරු’ත්තරකඤ්චුකං,
යොජනං තෙපි වඩ්ඪෙසුං ආයතං බුද්ධචෙතියං.

881. චතුයොජනමුබ්බිද්ධො බුද්ධථූපො විරොචතී,
ඔභාසෙති දිසා සබ්බා සතරංසීව උග්ගතො.

882. කුම්භණ්ඩා ච සමාගන්ත්වා එකතො මන්තයුං තදා,
“මනුස්සා චෙව දෙවා ච නාගා ච ගරුළා තථා.

883. පච්චෙකං බුද්ධසෙට්ඨස්ස අකංසු ථූපමුත්තමං,
මා නො පමත්තා අස්සුම්හා අප්පමත්තා සදෙවකා.

884. මයම්පි ථූපං කස්සාම ලොකනාථස්ස තාදිනො,
රතනෙහි ඡාදයිස්සාම ආයතං බුද්ධචෙතියං.

885. යොජනං තෙපි වඩ්ඪෙසුං ආයතං බුද්ධචෙතියං,
පඤ්චයොජනමුබ්බිද්ධො ථූපො ඔභාසතෙ තදා.