2660. වෙටම්බරීති මෙ නාමං පිතුසන්තං මමං තදා,
මම හත්ථං ගහෙත්වාන උපානයි මහාමුනිං.

2661. ඉමෙ මං උද්දිසිස්සන්ති බුද්ධා ලොකග්ගනායකා,
තෙ’හං උපට්ඨිං සක්කච්චං පසන්නො සෙහි පාණිහි.

2662. එකතිංසෙ ඉතො කප්පෙ බුද්ධෙ පරිචරිං තදා,
දුග්ගතිං නාභිජානාමි උපට්ඨානස්සිදං ඵලං.

2663. තෙවීසම්හි ඉතො කප්පෙ චතුරො ආසු ඛත්තියා,
සමණුපට්ඨාකා නාම චක්කවත්තී මහබ්බලා.

2664. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2665. චුල්ලාසීතිසහස්සානි පබ්බජිම්හ අකිඤ්චනා,
තෙසං පුබ්බඞ්ගමො ආසිං උත්තමත්ථස්ස පත්තියා.

2666. සරාගා සභවා චෙතෙ විප්පස්නනමනාවිලා,
උපට්ඨහිංසු සක්කච්චං පසන්නා සෙහි පාණිහි.

2667. ඛීණාසවා වන්තදොසා කතකිච්චා අනාසවා,
ඵරිංසු මෙත්තචිත්තෙන සයම්භූ අපරාජිතා.

2668. තෙසං උපට්ඨහිත්වාන සම්බුද්ධානං පතිස්සතො,
මරණඤ්ච අනුප්පත්තො දෙවත්තඤ්ච අගම්හසෙ.

2669. චතුනවුතෙ ඉතො කප්පෙ යා සීලමනුපාලයිං,
දුග්ගතිං නාභිජානාමි සඤ්ඤමස්ස ඉදං ඵලං.

2670. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

පණ්ණං ඵලං පච්චුග්ගමං එකපුප්ඵී ච මඝවා
උපට්ඨාකාපදානඤ්ච පබ්බජ්ජා බුද්ධුපට්ඨාකො
පුබ්බඞ්ගමො ච ගාථායො අට්ඨතාළීස කිත්තිතාති.