2623. පණ්ණසාලෙ නිසින්නොම්භි පණ්ණභොජනභොජනො,
උපවිට්ඨඤ්ච මං සන්තං උපාගච්ඡි මහාමුනි.

2624. සිද්ධත්ථො ලොකපජ්ජොතො සබ්බලොකතිකිච්ඡකො,
තස්ස පණ්ණං මයා දින්නං නිසින්නං පණ්ණසන්ථරෙ.

2625. චතුනවුතෙ ඉතො කප්පෙ යං පණ්ණමදදිං තදා,
දුග්ගතිං නාභිජානාමි පණ්ණදානස්සිදං ඵලං.

2626. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2627. සිනෙරුසමසන්තොසො ධරණීධරසාදිසො,
වුට්ඨිහිත්වා සමාදිම්භා භික්ඛාය මමුපට්ඨිතො.

2628. හරීතකං ආමලකං අම්බ ජම්බු විභීටකං,
කොලං භල්ලාතකං බිල්ලං ඵාරුසකඵලානි ච.

2829. සිද්ධත්ථස්ස මහෙසිස්ස සබ්බලොකානුකම්පිනො,
තඤ්ච සබ්බං මයා දින්නං විප්පසන්නෙන චෙතසා.

2630. චතුනවුතෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි ඵලදානස්සිදං ඵලං.

2631. සත්තපඤ්ඤාසිතො කප්පෙ එකජ්ඣො නාම ඛත්තියො,
සත්තරතනසම්පන්නො චක්කවත්තී මහබ්බලො.

2632. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2633. සීහං යථා වනචරං නිසභාජානියං යථා,
කකුධං විලසන්තංව ආගච්ඡන්තං නරාසභං.

2634. සිද්ධත්ථං ලොකපජ්ජොතං සබ්බලොකතිකිච්ඡකං,
අකාසිං පච්චුග්ගමනං විප්පසන්නෙන චෙතසා.

2635. එකනවුතෙ ඉතො කප්පෙ පච්චුග්ගච්ඡිං නරාසභං,
දුග්ගතිං නාභිජානාමි පච්චුග්ගමනෙ ඉදං ඵලං.

2636. සත්තවීසෙ ඉතො කප්පෙ එකො ආසිං ජනාධිපො,
සපරිවාරොති නාමෙන චක්කවත්තී මහබ්බලො.

2637. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2638. දක්ඛිණම්භි දුවාරම්හි පිසාචො ආසහං තදා,
අද්දසං විරජං බුද්ධං පීතරංසිං’ව භානුමං.

2639. විපස්සිස්ස නරග්ගස්ස සබ්බලොකහිතෙසිනො,
එකපුප්ඵං මයා දින්නං දිපදින්දස්ස තාදිනො.

2640. එකනවුතෙ ඉතො කප්පෙ යං පුප්ඵමදදිං තදා,
දුග්ගතිං නාභිජානාමි බුද්ධපූජායිදං ඵලං.

2641. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.