පඤ්චාලචන්දී විදෙහරඤ්ඤා පියා අහොසි මනාපා. සා දුතියෙ සංවච්ඡරෙ පුත්තං විජායි. තස්ස දසමෙ සංවච්ඡරෙ වෙදෙහරාජා කාලමකාසි. බොධිසත්තො තස්ස ඡත්තං උස්සාපෙත්වා “දෙව, අහං තව අය්යකස්ස චූළනිරඤ්ඤො සන්තිකං ගමිස්සාමී”ති ආපුච්ඡි. පණ්ඩිත, මා මං දහරං ඡඩ්ඩෙත්වා ගමිත්ථ, අහං තං පිතුට්ඨානෙ ඨපෙත්වා සක්කාරං කරිස්සාමීති. පඤ්චාලචන්දීපි නං “පණ්ඩිත, තුම්හාකං ගතකාලෙ අඤ්ඤං පටිසරණං නත්ථි, මා ගමිත්ථා”ති යාචි. සොපි “මයා රඤ්ඤො පටිඤ්ඤා දින්නා, න සක්කා අගන්තු”න්ති මහාජනස්ස කලුනං පරිදෙවන්තස්සෙව අත්තනො උපට්ඨාකෙ ගහෙත්වා නගරා නික්ඛමිත්වා උත්තරපඤ්චාලනගරං ගතො. රාජා තස්සාගමනං සුත්වා පච්චුග්ගන්ත්වා මහන්තෙන සක්කාරෙන නගරං පවෙසෙත්වා මහන්තං ගෙහං දත්වා ඨපෙත්වා පඨමදින්නෙ අසීතිගාමෙ න අඤ්ඤං භොගං අදාසි. සො තං රාජානං උපට්ඨාසි.

තදා භෙරී නාම පරිබ්බාජිකා රාජගෙහෙ භුඤ්ජති, සා පණ්ඩිතා බ්යත්තා. තාය මහාසත්තො න දිට්ඨපුබ්බො, “මහොසධපණ්ඩිතො කිර රාජානං උපට්ඨාතී”ති සද්දමෙව සුණාති. තෙනපි සා න දිට්ඨපුබ්බා, “භෙරී නාම පරිබ්බාජිකා රාජගෙහෙ භුඤ්ජතී”ති සද්දමෙව සුණාති. නන්දාදෙවී පන “පියවිප්පයොගං කත්වා අම්හෙ කිලමාපෙසී”ති බොධිසත්තෙ අනත්තමනා අහොසි. සා පඤ්චසතා වල්ලභිත්ථියො ආණාපෙසි “මහොසධස්ස එකං දොසං උපධාරෙත්වා රඤ්ඤො අන්තරෙ පරිභින්දිතුං වායමථා”ති. තා තස්ස අන්තරං ඔලොකෙන්තියො විචරන්ති.

අථෙකදිවසං සා පරිබ්බාජිකා භුඤ්ජිත්වා රාජගෙහා නික්ඛන්තී බොධිසත්තං රාජුපට්ඨානං ආගච්ඡන්තං රාජඞ්ගණෙ පස්සි. සො තං වන්දිත්වා අට්ඨාසි. සා “අයං කිර පණ්ඩිතො, ජානිස්සාමි තාවස්ස පණ්ඩිතභාවං වා අපණ්ඩිතභාවං වා”ති හත්ථමුද්දාය පඤ්හං පුච්ඡන්තී බොධිසත්තං ඔලොකෙත්වා හත්ථං පසාරෙසි. සා කිර “කීදිසං, පණ්ඩිත, රාජා තං පරදෙසතො ආනෙත්වා ඉදානි පටිජග්ගති, න පටිජග්ගතී”ති මනසාව පඤ්හං පුච්ඡි. බොධිසත්තො “අයං හත්ථමුද්දාය මං පඤ්හං පුච්ඡතී”ති ඤත්වා පඤ්හං විස්සජ්ජෙන්තො හත්ථමුට්ඨිං අකාසි. සො කිර “අය්යෙ, මම පටිඤ්ඤං ගහෙත්වා පක්කොසිත්වා ඉදානි රාජා ගාළ්හමුට්ඨිව ජාතො, න මෙ අපුබ්බං කිඤ්චි දෙතී”ති මනසාව පඤ්හං විස්සජ්ජෙසි. සා තං කාරණං ඤත්වා හත්ථං උක්ඛිපිත්වා අත්තනො සීසං පරාමසි. තෙන ඉදං දස්සෙති “පණ්ඩිත, සචෙ කිලමසි, මයං විය කස්මා න පබ්බජසී”ති? තං ඤත්වා මහාසත්තො අත්තනො කුච්ඡිං පරාමසි. තෙන ඉදං දස්සෙති “අය්යෙ, මම පොසිතබ්බා පුත්තදාරා බහුතරා, තෙන න පබ්බජාමී”ති. ඉති සා හත්ථමුද්දාය පඤ්හං පුච්ඡිත්වා අත්තනො ආවාසමෙව අගමාසි. මහාසත්තොපි තං වන්දිත්වා රාජුපට්ඨානං ගතො.