එවඤ්ච පන වත්වා මාතලි දෙවලොකාභිමුඛං රථං පෙසෙසි. රාජා දෙවලොකං ගච්ඡන්තො ද්වාදසයොජනිකං මණිමයං පඤ්චථූපිකං සබ්බාලඞ්කාරපටිමණ්ඩිතං උය්යානපොක්ඛරණිසම්පන්නං කප්පරුක්ඛපරිවුතං බීරණියා දෙවධීතාය ආකාසට්ඨකවිමානං දිස්වා, තඤ්ච දෙවධීතරං අන්තොකූටාගාරෙ සයනපිට්ඨෙ නිසින්නං අච්ඡරාසහස්සපරිවුතං මණිසීහපඤ්ජරං විවරිත්වා ඔලොකෙන්තිං දිස්වා මාතලිං පුච්ඡන්තො ගාථමාහ. ඉතරොපිස්ස බ්යාකාසි.

තත්ථ පඤ්චථූපන්ති පඤ්චහි කූටාගාරෙහි සමන්නාගතං. මාලාපිළන්ධාති මාලාදීහි සබ්බාභරණෙහි පටිමණ්ඩිතාති අත්ථො. තත්ථච්ඡතීති තස්මිං විමානෙ අච්ඡති. උච්චාවචං ඉද්ධි විකුබ්බමානාති නානප්පකාරං දෙවිද්ධිං දස්සයමානා. දිස්වාති එතං දිස්වා ඨිතං මං විත්ති වින්දති පටිලභති, විත්තිසන්තකො විය හොමි තුට්ඨියා අතිභූතත්තාති අත්ථො. ආමායදාසීති ගෙහදාසියා කුච්ඡිම්හි ජාතදාසී. අහු බ්රාහ්මණස්සාති සා කිර කස්සපදසබලස්ස කාලෙ එකස්ස බ්රාහ්මණස්ස දාසී අහොසි. සා පත්තකාලන්ති තෙන බ්රාහ්මණෙන අට්ඨ සලාකභත්තානි සඞ්ඝස්ස පරිච්චත්තානි අහෙසුං. සො ගෙහං ගන්ත්වා “ස්වෙ පට්ඨාය එකෙකස්ස භික්ඛුස්ස එකෙකං කහාපණග්ඝනකං කත්වා අට්ඨ සලාකභත්තානි සම්පාදෙය්යාසී”ති බ්රාහ්මණිං ආහ. සා “සාමි, භික්ඛු නාම ධුත්තො, නාහං සක්ඛිස්සාමී”ති පටික්ඛිපි. ධීතරොපිස්ස පටික්ඛිපිංසු. සො දාසිං “සක්ඛිස්සසි අම්මා”ති ආහ. සා “සක්ඛිස්සාමි අය්යා”ති සම්පටිච්ඡිත්වා සක්කච්චං යාගුඛජ්ජකභත්තාදීනි සම්පාදෙත්වා සලාකං ලභිත්වා ආගතං පත්තකාලං අතිථිං විදිත්වා හරිතගොමයුපලිත්තෙ කතපුප්ඵුපහාරෙ සුපඤ්ඤත්තාසනෙ නිසීදාපෙත්වා යථා නාම විප්පවාසා ආගතං පුත්තං මාතා සකිං අභිනන්දති, තථා නිච්චකාලං අභිනන්දති, සක්කච්චං පරිවිසති, අත්තනො සන්තකම්පි කිඤ්චි දෙති. සංයමා සංවිභාගා චාති සා සීලවතී අහොසි චාගවතී ච, තස්මා තෙන සීලෙන චෙව චාගෙන ච ඉමස්මිං විමානෙ මොදති. අථ වා සංයමාති ඉන්ද්රියදමනා.

එවඤ්ච පන වත්වා මාතලි පුරතො රථං පෙසෙත්වා සොණදින්නදෙවපුත්තස්ස සත්ත කනකවිමානානි දස්සෙසි. සො තානි ච තස්ස ච සිරිසම්පත්තිං දිස්වා තෙන කතකම්මං පුච්ඡි. ඉතරොපිස්ස බ්යාකාසි.