109. යො කාමරාගානුසයං නප්පජහති සො පටිඝානුසයං නප්පජහතීති: ආමන්තා.

යො වා පන පටිඝානුසයං නප්පජහති සො කාමරාගානුසයං නප්පජහතීති: ආමන්තා.

110. යො කාමරාගානුසයං නප්පජහති සො මානානුසයං නප්පජහතීති: අග්ගමග්ගසමඞ්ගී කාමරාගානුසයං නප්පජහති, නො ච සො මානානුසයං නප්පජහති. ද්වින්නං මග්ගසමඞ්ගීනං ඨපෙත්වා අවසෙසා පුග්ගලා කාමරාගානුසයඤ්ච නප්පජහන්ති, මානානුසයඤ්ච නප්පජහන්ති.

යො වා පන මානානුසයං නප්පජහති සො කාමරාගානුසයං නප්පජහතීති: අනාගාමිමග්ගසමඞ්ගී මානානුසයං නප්පජහති, නො ච සො කාමරාගානුසයං නප්පජහති. ද්වින්නං මග්ගසමඞ්ගීනං ඨපෙත්වා අවසෙසා පුග්ගලා මානානුසයඤ්ච නප්පජහන්ති, කාමරාගානුසයඤ්ච නප්පජහන්ති.

111-112. යො කාමරාගානුසයං නප්පජහති සො දිට්ඨානුසයං -පෙ- විචිකිච්ඡානුසයං නප්පජහතීති: අට්ඨමකො කාමරාගානුසයං නප්පජහති, නො ච සො විචිකිච්ඡානුසයං නප්පජහති. අනාගාමී මග්ගසමඞ්ගිඤ්ච අට්ඨමකඤ්ච ඨපෙත්වා අවසෙසා පුග්ගලා කාමරාගානුසයංඤ්ච නප්පජහන්ති, විචිකිච්ඡානුසයඤ්ච නප්පජහන්ති.

යො වා පන විචිකිච්ඡානුසයං නප්පජහති සො කාමරාගානුසයං නප්පජහතීති: අනාගාමිමග්ගසමඞ්ගී විචිකිච්ඡානුසයං නප්පජහති, නො ච සො කාමරාගානුසයං නප්පජහති. අනාගාමිමග්ගසමඞ්ගිඤ්ච අට්ඨමකඤ්ච ඨපෙත්වා අවසෙසා පුග්ගලා විචිකිච්ඡානුසයඤ්ච නප්පජහන්ති, කාමරාගානුසයඤ්ච නප්පජහන්ති.

113-114. යො කාමරාගානුසයං නප්පජහති සො භවරාගානුසයං -පෙ- අවිජ්ජානුසයං නප්පජහතීති: අග්ගමග්ගසමඞ්ගී කාමරාගානුසයං නප්පජහති, නො ච සො අවිජ්ජානුසයං නප්පජහති. ද්වින්නං මග්ගසමඞ්ගීනං ඨපෙත්වා අවසෙසා පුග්ගලා කාමරාගානුසයඤ්ච නප්පජහන්ති, අවිජ්ජානුසයඤ්ච නප්පජහන්ති.

යො වා පන අවිජ්ජානුසයං නප්පජහති සො කාමරාගානුසයං නප්පජහතීති, අනාගාමිමග්ගසමඞ්ගී අවිජ්ජානුසයං නප්පජහති, නො ච සො කාමරාගානුසයං නප්පජහති. ද්වින්නං මග්ගසමඞ්ගීනං ඨපෙත්වා අවසෙසා පුග්ගලා අවිජ්ජානුසයඤ්ච නප්පජහන්ති. කාමරාගානුසඤ්ච නප්පජහන්ති.