දුඃඛසත්‍යයෙහි නො දැනීම, දුඃඛසමුදයෙහි නො දැනීම, දුඃඛනිරෝධයෙහි නො දැනීම, දුඃඛනිරෝධගාමිනී ප්‍රතිපදායෙහි නො දැනීම, පූර්‍වාන්තයෙහි නො දැනීම, අපරාන්තයෙහි නො දැනීම, පූර්‍වාන්තාපරාන්තයෙහි නො දැනීම. ඉදම්ප්‍රත්‍යතාප්‍රතීත්‍යසමුත්පන්න ධර්‍මයන්හි නො දැනීම, යන යම් මෙබඳු වූ අඥානයෙක් අදර්‍ශනයෙක් අනභිසමයෙක් අනනුබෝධයෙක් අසම්බෝධයෙක් අප්‍රතිවේධයෙක් (අනිත්‍යාදි සාමාන්‍ය හෙයින්) මොනවට නො ගැනීමෙක් හාත්පසින් නො ගැනීමෙක් සමව නො දැකීමෙක් (ධර්‍මස්වභාවය) නො දැකීමෙක් ප්‍රත්‍යක්‍ෂ නො කිරීමෙක් දුර්මේධ්‍යයෙක් බාල බවෙක් අසම්‍යග්ඥානයෙක් මෝහයෙක් ප්‍රමෝහයෙක් සම්මෝහයෙක් අවිද්‍යාවක් අවිද්‍යෝඝයෙක් අවිද්‍යායෝගයෙක් අවිද්‍යානුශයයෙක් අවිද්‍යාපර්‍ය්‍යුත්‍ථානයෙක් අවිද්‍යාලඞ්ගියෙක් මෝහ - අකුශලමූලයෙක් වේ ද, මේ මෝහ යයි කියනු ලැබේ.
මේ තුන් අකුසල හේතු යි.
1067. එහි තුන් අව්‍යාකෘතහේතු කවරහ යත්:
කුශලධර්‍මයන්ගේ විපාක හෙයින් හෝ ක්‍රියා - අව්‍යාකෘත ධර්‍මයන්හි හෝ අලෝභ ය, අදෝස ය, අමෝහය යි. මොහු තුන් අව්‍යාකෘත හේතු යි.
1068. එහි නව කාමාවචර හේතු කවර යත්:
තුන් කුසල හේතු ය. තුන් අකුසල හේතුය. තුන් අව්‍යාකෘත හේතු යි. මොහු නව කාමාවචර හේතු යි.
1069. එහි ෂඩ් රූපාවචර හේතු කවරහ යත්:
තුන් කුසල හේතු ය. තුන් අව්‍යාකෘත හේතු යි. මොහු ෂඩ් රූපාවචර හේතු යි.
1070. එහි ෂඩ් අරූපාවචර හේතු කවරහ යත්:
තුන් කුසල හේතු ය. තුන් අව්‍යාකෘත හේතු යි. මොහු ෂඩ් අරූපාවචර හේතු යි.
1071. එහි ෂඩ් අපරියාපන්න හේතු කවරහ යත්:
තුන් කුසල හේතු ය. තුන් අව්‍යාකෘත හේතු යි. මොහු ෂඩ් අපරියාපන්න හේතු යි.
1072. එහි තුන් කුශල හේතු කවර යත්:
අලෝභ ය, අදෝස ය, අමෝහ යි.
1073. එහි අලෝභය කවරේ යත්:
යම් අලෝභයෙක් අලෝභකාරයෙක් අලුබ්ධ බවෙක් අසංරාගයෙක් අසංරක්තාකාරයෙක් අසංරක්ත බවෙක් අනභිධ්‍යාවක් අලෝභ - කුසල මූලයෙක් වේ ද, මේ අලෝභ යි කියනු ලැබේ.
1074. එහි අදෝසය කවරේ යත්:
යම් අදෝෂයෙක් අදූෂ්‍යාකාරයෙක් අදූෂිත බවෙක් ... අව්‍යාපාදයෙක් නිදුක් බවෙක් අද්වේෂ - කුශල මූලයෙක් වේ ද, මේ අදෝස ය යි කියනු ලැබේ.
1075. එහි අමෝහය කවරේ යත්:
දුඃඛසත්‍යයෙහි ඥානය, දුඃඛසමුදයෙහි ඥානය, දුඃඛනිරෝධයෙහි ඥානය, දුඃඛනිරෝධගාමිනී ප්‍රතිපදායෙහි ඥානය, පූර්‍වාන්තයෙහි ඥානය, අපරාන්තයෙහි ඥානය, පූර්‍වාන්තාපරාන්තයෙහි ඥානය, ඉදම්ප්‍රත්‍යයතාප්‍රතීත්‍යසමුත්පන්න ධර්‍මයන්හි ඥානය, යන මෙබඳු වූ යම් ප්‍රඥාවක් ප්‍රජානනාකාරයෙක් විචයයෙක් ප්‍රවිචයයෙක් ධර්‍මවිචයයෙක් සංලක්‍ෂණයෙක් උපලක්‍ෂණයෙක් ප්‍රත්‍යුපලක්‍ෂණයෙක් පාණ්ඩිත්‍යයෙක් කෞශල්‍යයෙක් නෛපුණ්‍යයෙක් විභාවනයෙක් චින්තායෙක් උපපරීක්‍ෂාවෙක් භූරිප්‍රඥායෙක් ධාරණප්‍රඥායෙක් පරිණායිකාවක් විදර්‍ශනායෙක් සම්‍යග්ඥානයෙක් පතෝදයෙක් ප්‍රඥායෙක් ප්‍රඥේන්‍ද්‍රියයෙක් ප්‍රඥාබලයෙක් ප්‍රඥාශස්ත්‍රයෙක් ප්‍රඥාප්‍රාසාදයෙක් ප්‍රඥා - ආලෝකයෙක් ප්‍රඥා - අවභාසයෙක් ප්‍රඥාප්‍රද්‍යොතයෙක් ප්‍රඥාරත්නයෙක් අමෝහයෙක් ධර්‍මවිචයයෙක් සම්‍යග්දෘෂ්ටියෙක් ධර්‍මවිචයසම්බෝධ්‍යඞ්ගයෙක් මාර්‍ගාඞ්ගයෙක් මාර්‍ගපර්‍ය්‍යාපන්නයෙක් වේ ද, මේ අමෝහය යි කියනු ලැබේ.
මොහු තුන් කුසල හේතු යි.
1076. එහි තුන් අව්‍යාකෘත හේතු කවරහ යත්:
කුසල ධර්‍මයන්ගේ විපාක හෙයින් අලෝභ ය, අදෝස ය, අමෝහ ය, යන මොහු තුන් අව්‍යාකෘත හේතු යි.
මොහුසදෙන අපරියාපන්න හේතු යි.
මේ ධර්‍මයෝ හේතු නම් වෙත්.
1077. කවර ධර්‍මයෝ නහේතු (හේතු නො වූවාහු) වෙති යත්:
ඒ (හේතු) ධර්‍මයන් තබා අවශේෂ කාමාවචර - රූපාවචර - අරූපාවචර - අපරියාපන්න වූ කුශල - අකුශල - අව්‍යාකෘත ධර්‍මයෝ ය. වේදනාස්කන්‍ධය ... විඥානස්කන්‍ධ ය, සියලු රූපය ද, අසඞ්ඛත (නිබ්බාන) ධාතුව ද, යන මේ ධර්‍මයෝ නහේතු නම් වෙත්.