අට්ඨිමානි භික්ඛවෙ මලානි කතමානි අට්ඨ.

අසජ්ඣාය මලා භික්ඛවෙ මන්තා, අනුට්ඨානමලා භික්ඛවෙ ඝරා, මලං භික්ඛවෙ වණ්ණස්ස කොසජ්ජං, පමාදො භික්ඛවෙ රක්ඛතො මලං. මලං භික්ඛවෙ ඉත්ථියා දුච්චරිතං. මච්ඡෙරං භික්ඛවෙ දදතො මලං. මලා භික්ඛවෙ පාපකා අකුසලා ධම්මා අස්මිං ලොකෙ පරම්හි ච. තතො භික්ඛවෙ මලා මලතරං අවිජ්ජා පරමං මලං. ඉමානි ඛො භික්ඛවෙ අට්ඨ මලානීති.

අට්ඨහි භික්ඛවෙ ධම්මෙහි සමන්නාගතො භික්ඛු දූතෙය්යං ගන්තුමරහති. කතමෙහි අට්ඨහි:

ඉධ භික්ඛවෙ භික්ඛු සොතා ච හොති සාවෙතා ච, උග්ගහෙතා ච ධාරෙතා ච, විඤ්ඤාතා ච විඤ්ඤාපෙතා ච, කුසලො ච සහිතාසහිතස්ස, නො ච කලහකාරකො. ඉමෙහි ඛො භික්ඛවෙ, අට්ඨහි ධම්මෙහි සමන්නාගතො භික්ඛු දූතෙය්යං ගන්තුමරහති.

අට්ඨහි භික්ඛවෙ ධම්මෙහි සමන්නාගතො සාරිපුත්තො දූතෙය්යං ගන්තුමරහති. කතමෙහි අට්ඨහි:

ඉධ භික්ඛවෙ සාරිපුත්තො සොතා ච හොති සාවෙතා ච, උග්ගහෙතා ච, ධාරෙතා ච, විඤ්ඤාතා ච, විඤ්ඤාපෙතා ච, කුසලො ච සහිතාසහිතස්ස, නො ච කලහකාරකො. ඉමෙහි ඛො භික්ඛවෙ අට්ඨහි ධම්මෙහි සමන්නාගතො සාරිපුත්තො දූතෙය්යං ගන්තුමරහතීති.