අට්ඨහි භික්ඛවෙ ධම්මෙහි සමන්නාගතො භික්ඛු දූතෙය්යං ගන්තුමරහති. කතමෙහි අට්ඨහි:

ඉධ භික්ඛවෙ භික්ඛු සොතා ච හොති සාවෙතා ච, උග්ගහෙතා ච ධාරෙතා ච, විඤ්ඤාතා ච විඤ්ඤාපෙතා ච, කුසලො ච සහිතාසහිතස්ස, නො ච කලහකාරකො. ඉමෙහි ඛො භික්ඛවෙ, අට්ඨහි ධම්මෙහි සමන්නාගතො භික්ඛු දූතෙය්යං ගන්තුමරහති.

අට්ඨහි භික්ඛවෙ ධම්මෙහි සමන්නාගතො සාරිපුත්තො දූතෙය්යං ගන්තුමරහති. කතමෙහි අට්ඨහි:

ඉධ භික්ඛවෙ සාරිපුත්තො සොතා ච හොති සාවෙතා ච, උග්ගහෙතා ච, ධාරෙතා ච, විඤ්ඤාතා ච, විඤ්ඤාපෙතා ච, කුසලො ච සහිතාසහිතස්ස, නො ච කලහකාරකො. ඉමෙහි ඛො භික්ඛවෙ අට්ඨහි ධම්මෙහි සමන්නාගතො සාරිපුත්තො දූතෙය්යං ගන්තුමරහතීති.

අට්ඨහි භික්ඛවෙ ආකාරෙහි ඉත්ථි පුරිසං බන්ධති, කතමෙහි අට්ඨහි:

රූපෙන භික්ඛවෙ, ඉත්ථි පුරිසං බන්ධති. හසිතෙන භික්ඛවෙ ඉත්ථි පුරිසං බන්ධති. භණිතෙන භික්ඛවෙ ඉත්ථි පුරිසං බන්ධති. ගීතෙන භික්ඛවෙ ඉත්ථි පුරිසං බන්ධති. රුණ්ණෙන භික්ඛවෙ ඉත්ථි පුරිසං බන්ධති. ආකප්පෙන භික්ඛවෙ ඉත්ථි පුරිසං බන්ධති. වනභඞ්ගෙන භික්ඛවෙ, ඉත්ථී පුරිසං බන්ධති. ඵස්සෙන භික්ඛවෙ ඉත්ථි පුරිසං බන්ධති. ඉමෙහි ඛො භික්ඛවෙ අට්ඨහි ආකාරෙහි ඉත්ථි පුරිසං බන්ධති. තෙ භික්ඛවෙ සත්තා සුබද්ධා යෙ ඵස්සෙන බද්ධාති.

අට්ඨහි භික්ඛවෙ ආකාරෙහි පුරිසො ඉත්ථිං බන්ධති, කතමෙහි අට්ඨහි:

රූපෙන භික්ඛවෙ පුරිසො ඉත්ථිං බන්ධති, හසිතෙන භික්ඛවෙ පුරිසො ඉත්ථිං බන්ධති. භණිතෙන භික්ඛවෙ පුරිසො ඉත්ථිං බන්ධති. ගීතෙන භික්ඛවෙ පුරිසො ඉත්ථිං බන්ධති. රුණ්ණෙන භික්ඛවෙ පුරිසො ඉත්ථිං බන්ධති. ආකප්පෙන භික්ඛවෙ පුරිසො ඉත්ථිං බන්ධති. වනභඞ්ගෙන භික්ඛවෙ, පුරිසො ඉත්ථිං බන්ධති. ඵස්සෙන භික්ඛවෙ පුරිසො ඉත්ථිං බන්ධති. ඉමෙහි ඛො භික්ඛවෙ අට්ඨහි ආකාරෙහි පුරිසො ඉත්ථිං බන්ධති, තෙ භික්ඛවෙ සත්තා සුබද්ධා යෙ ඵස්සෙන බද්ධාති.