එවං මෙ සුතං එකං සමයං භගවා වෙරඤ්ජායං විහරති නලෙරුපුචිමන්ද මූලෙ අථ ඛො වෙරඤ්ජො බ්රාහ්මණො යෙන භගවා තෙනුපසඞ්කමි, උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි, එකමන්තං නිසින්නො ඛො වෙරඤ්ජො බ්රාහ්මණො භගවන්තං එතදවොච:

සුතං මෙතං භො ගොතම, න සමණො ගොතමො බ්රාහ්මණෙ ජිණ්ණෙ වුද්ධෙ මහල්ලකෙ අද්ධගතෙ වයොඅනුප්පත්තෙ අභිවාදෙති වා පච්චුට්ඨෙති වා ආසනෙන වා නිමන්තෙතීති තයිදං භො ගොතම, තථෙව, නහි භවං ගොතමො බ්රාහ්මණෙ ජිණ්ණෙ වුද්ධෙ මහල්ලකෙ අද්ධගතෙ වයොඅනුප්පත්තෙ අභිවාදෙති වා පච්චුට්ඨෙති වා ආසනෙන වා නිමන්තෙති, තයිදං භො ගොතම න සම්පන්නමෙවාති.

නාහං තං බ්රාහ්මණ, පස්සාමි සදෙවකෙ ලොකෙ සමාරකෙ සබ්රහ්මකෙ සස්සමණබ්රාහ්මණියා පජාය සදෙවමනුස්සාය යමහං අභිවාදෙය්යං වා පච්චුට්ඨෙය්යං වා ආසනෙන වා නිමන්තෙය්යං. යං හි බ්රාහ්මණ, තථාගතො අභිවාදෙය්ය වා පච්චුට්ඨෙය්ය වා ආසනෙන වා නිමන්තෙය්ය මුද්ධාපි තස්ස විපතෙය්යාති.

1. අරසරූපො භවං ගොතමොති.

අත්ථි ඛ්වෙස බ්රාහ්මණ, පරියායො යෙන මං පරියායෙන සම්මා වදමානො වදෙය්ය ‘අරසරූපො සමණො ගොතමො’ ති. යෙ තෙ බ්රාහ්මණ, රූපරසා සද්දරසා ගන්ධරසා රසරසා පොට්ඨබ්බරසා තෙ තථාගතස්ස පහීනා, උච්ඡින්නමූලා තාලාවත්ථුකතා අනභාවකතා ආයතිං අනුප්පාදධම්මා, අයං ඛො බ්රාහ්මණ පරියායො යෙන මං පරියායෙන සම්මාවදමානො වදෙය්ය අරසරූපො සමණො ගොතමො’ති. නො ච ඛො යං ත්වං සන්ධාය වදෙසි.

2. නිබ්භොගො භවං ගොතමොති.

අත්ථි ඛ්වෙස බ්රාහ්මණ, පරියායො, යෙන මං පරියායෙන සම්මා වදමානො වදෙය්ය- නිබ්භොගො සමණො ගොතමො’ති. යෙ තෙ බ්රාහ්මණ, රූපභොගා සද්දභොගා ගන්ධභොගා රසභොගා පොට්ඨබ්බභොගා තෙ තථාගතස්ස පහීනා උච්ඡින්නමූලා තාලාවත්ථුකතා අනභාවකතා ආයතිං අනුප්පාදධම්මා, අයං ඛො බ්රාහ්මණ පරියායො යෙන පරියායෙන සම්මා වදමානො වදෙය්ය නිබ්භොගො සමණො ගොතමොති, නො ච ඛො යං ත්වං සන්ධාය වදෙසි.

3. අකිරියවාදො භවං ගොතමොති.

අත්ථි ඛ්වෙස බ්රාහ්මණ, පරියායො, යෙන මං පරියායෙන සම්මා වදමානො වදෙය්ය, අකිරියවාදො සමණො ගොතමො’ ති. අහං හි බ්රාහ්මණ, අකිරියං වදාමි කායදුච්චරිතස්ස වචීදුච්චරිතස්ස මනොදුච්චරිතස්ස, අනෙකවිහිතානං පාපකානං අකුසලානං ධම්මානං අකිරියං වදාමි. අයං ඛො බ්රාහ්මණ, පරියායො යෙන මං පරියායෙන සම්මා වදමානො වදෙය්ය අකිරියවාදො සමණො ගොතමොති. නො ච ඛො යං ත්වං සන්ධාය වදෙසි.

4. උච්ඡෙදවාදො භවං ගොතමොති.

අත්ථි ඛ්වෙස බ්රාහ්මණ, පරියායො යෙන මං පරියායෙන සම්මා වදමානො වදෙය්ය උච්ඡෙදවාදො සමණො ගොතමො’ ති. අහං හි බ්රාහ්මණ, උච්ඡෙදං වදාමි රාගස්ස දොසස්ස මොහස්ස, අනෙකවිහිතානං පාපකානං අකුසලානං ධම්මානං උච්ඡෙදං වදාමි. අයං ඛො බ්රාහ්මණ, පරියායො, යෙන මං පරියායෙන සම්මා වදමානො වදෙය්ය උච්ඡෙදවාදො සමණො ගොතමො’ ති, නො ච ඛො යං ත්වං සන්ධාය වදෙසි.